陳偉霆拍時裝品牌廣告大晒港式英語惹網民爭議

近年「的士陳」陳偉霆(William)北上發展，更成為內地全國最受名牌熱愛的男星之一。前幾日，迪士尼電影《阿拉丁》嘅主題曲《A Whole New World》搵咗William同《中國好聲音》第三季總冠軍張碧晨主唱，不過William嘅唱功受盡負評。而日前William為知名時裝品牌拍攝嘅腕錶廣告出街後，其港式英語亦被受網民關注。

今次呢個廣告搵咗好多重量級人馬助陣，包括有英國女演員Keira Knightley、超模Naomi Campbell等，William係整個廣告系列中唯一一位男星，可見身份地位幾咁重。廣告入面，William用大約45秒時間去表達自己由17歲入行至今嘅生路歷程。有網民就話William嘅香港口音比較重，其中有一個「I really want to try」個”try”佢會講成中文嘅「猜」，仲有「Artist」變「阿tist」。

網路紅人蕭叔叔就將William廣告中嘅演繹重新配音再放上社交網站及留言：「徇眾要求，蕭叔叔配音版 ，Please tell this uncle to get a life.#無收錢的廣告系列。」有網民聽到蕭叔叔嘅演繹直言話：「耳朵懷孕，聽原版即刻流產。」