陳雅倫上《直播靈接觸》講被鍾保羅靈體跟隨多年 通靈「現身」澄清輕生原因？

TVB靈異節目《直播靈接觸》轉瞬添食播出第2季，最新一集搵到90年代性感女星陳雅倫做嘉賓，分享自己曾被男鬼上身經歷，仲聲稱被已故男藝人跟住多年！

陳雅倫提到自細就能夠感應靈體，小學時試過喺屋企聽到有把聲叫佢全名，又試過叫佢喺床度起身，將手指塞入媽咪嘅指甲油，如果媽咪問起就答佢「去痾尿」，幸而媽咪發現Ellen行為有異叫醒佢。陳雅倫話再大個啲就試過「俾嘢責」，仲感覺到被靈體摸大腿。到去年陳雅倫喺內地工作，佢感到入住嘅酒店「有嘢」，住到第六晚突然驚覺兩邊手臂內側瘀咗，瘀痕仲要係對稱。陳雅倫憶述之前一晚「唔郁得」（暗示「俾嘢責」），但因為已經慣咗，加上做嘢好攰，於是就無理會，「由得你搞」。

隨後梁思浩提到陳雅倫曾被某已故男藝人嘅靈體跟住，Ellen話出道時拍過張學友歌曲Amour嘅MV，而男藝人就係《勁歌金曲》主持。陳雅倫指該男藝人介紹歌曲嘅時候「唔係話首歌係張學友嘅歌，或者好好聽。而係叫大家留意個MV女主角『好靚架呢個新女仔，佢叫陳雅倫』……之後就有人同我講『佢好鍾意你呀』」，但Ellen同男藝人並唔熟。

後來男藝人離世，有師傅提醒陳雅倫「佢有跟住你」，但Ellen冇在意。有次清明節前後陳雅倫去澳門搵一個開紙紮鋪嘅的神婆，順道買衣紙燒俾已故親人，點知一齊燒嘢時，蹲喺度嘅神婆突然變臉同佢講『你識我嘅，我姓鍾嘅』，似乎係俾「上身」。後來陳雅倫決志信主，有日臨瞓前睇聖經時，聽到有把男人聲喺她耳邊講「Ellen，我好掛住你」，但對方聲音唔恐怖，Ellen唔覺得驚，將聖經放係床頭就瞓。

而家係塔羅師嘅前TVB藝人羅泳嫻以嘉賓身份用塔羅牌通靈，同該位已故鍾姓男藝人接觸。羅泳嫻解讀時指，鍾先生因為Ellen外表亮麗而且性格開朗而有好感。羅泳嫻仲話喺耳邊聽到鍾先生對佢唱陳百強嘅《喝采》，而《喝采》主演之一，正是已故嘅鍾保羅。羅泳嫻認為陳雅倫曾受負能量所纒，於是鍾先生間中出現保護佢，屬於兄妹式傾慕之情。

節目最後一節，羅泳嫻以塔羅牌了解鍾先生離世原因，透露當時鍾感到唔開心，身邊人認為佢有壓力，於是鍾搵方法花錢令自己開心，但未有改善，最終因為覺得太辛苦而選擇告別世界。羅泳嫻認為鍾先生死前有抑鬱症，但外界一直以為佢係經濟有問題，羅泳嫻強調經濟壓力同鍾尋死有一定關係，但唔一定只係因為錢而輕生。羅泳嫻又謂鍾先生離世後曾「出現」於自己喪禮，得知同事間本來想幫佢，令鍾心存感激。

曾是TVB 80年代金牌司儀嘅鍾保羅，於1989年9月從沙田寓所身亡，終年30歲。