陶大宇陪年邁母親飲茶 親自推輪椅盡顯孝心

陶大宇自從離開大台後，主攻內地市場，除了拍劇外，也會到不同城市登台賺外快，而侍母至孝的他，就算再忙都會定時抽空陪伴年邁母親媽咪，《蘋果》讀者日前就發現大宇推住坐輪椅的媽媽去飲茶，出入或過馬路時都相當小心，認真夠孝順。

《蘋果》讀者蘇小姐日前透過「爆相爆片」表示，當天大約下午一點半左右，在海怡半島商場對出位置，看到陶大宇正推了坐輪椅的媽咪，雖然有外傭在場，但他依然親力親為：「佢推住輪椅過馬路時，好小心睇清楚有冇車至過，輪椅上路壆時，又好輕力慢慢就住，跟住佢哋就入咗商場。」而從讀者提供的短片中，大宇確是細心又有孝心，而外傭則負責拿環保袋和背囊，大宇推住媽咪上路壆時，外傭即幫手推輪椅，陶媽媽全程都面露笑容。

其實大宇媽咪在兩、三年前因為弄傷腰骨而影響活動能力，大宇接受《蘋果》訪問，指當日是陪媽咪去飲茶，平時都會好規律抽時間陪媽咪：「媽咪90歲，其實都正常嘅，佢有骨質疏鬆，之前因為換床單時唔小心整親，不過都冇咩嘢，老人家都算正常啦！」

他表示陪媽咪飲茶前一天才由南京返港，翌日即趁有空閒多陪家人：「啱啱去完張家界和南京登台，嚟緊又要飛，我哋都係要周圍走，工作冇辦法。」此外，有網民將大宇登台唱歌片段放上網，當時大宇正演唱劉德華的《倒轉地球》，網民留言笑指：「比江華更劉華腔」，大宇則表示：「我唱佢嘅歌嘛！」