雅虎香港新聞 【電影LOL】梅麗史翠普12月又有新戲 Let Them All Talk冇劇本盡見演員功力
估唔到雄霸今個聖誕節檔期嘅演員，竟然係梅姨梅麗史翠普！早前串流平台Netflix公布將以音樂劇The Prom作為應節鉅獻，電影有梅姨、妮歌潔曼仲有James Corden主演，梅姨嘅角色結合《穿Prada的惡魔》加《媽媽咪呀！》，飾演性格刻薄mean到爆嘅巨星，成個cast又唱又跳，的確好適合佳節欣賞。
點知梅姨12月仲有新戲Let Them All Talk於HBOmax登場，同自己打對台！電影由《世紀戰疫》史提芬蘇德堡執導，導演以往作品一向係各大片廠必爭之物，今年因為疫情關係，串流平台用戶急升，極需要大量作品留住班客，好似導演同梅姨合作嘅前作《洗錢天堂網絡》（The Laundromat）就被Netflix成功購入播映權，而Let Them All Talk就被HBOmax爭贏咗！
故事講述梅麗史翠普飾演嘅成功作家獲邀到英國領獎，佢邀請咗2位好友（分別由《假鳳虛凰》Dianne West及《新娘愛作戰》Candice Bergen飾演）及其姪甥（《不得鳥小姐》Lucas Hedges飾演）齊齊坐上豪華郵輪前往。本來一個好友聚舊嘅寫作之旅變成盡訴猜忌，互相指責之旅。曾主演《Marvel隊長》、《我的超豪男友》嘅Gemma Chan將會飾演梅姨嘅編輯，仲同Lucas搞曖昧！
美媒Entertainment Weekly近日訪問咗3位女主角，幾位不約而同表示欣賞史提芬蘇德堡，所以劇本都無就應承參與，結果佢咃喺訪問中爆料，話套戲真係無劇本 ，戲中對白都係即場發揮臨場爆肚！
事緣導演想增加真實感及懸疑性，所以無提供完整對白，不過就為每個角色提供背景、性格及人生遭遇等資料，編劇Deborah Eisenberg亦會為每場戲提供大綱同發展走向，其他就交由演員自行發揮！
電影全程喺瑪麗皇后郵輪上拍攝，全部實境連同船上嘅人都係真旅客，所以台前幕後出入拍攝時，衣著都要跟足郵輪要求，梅姨仲話第一次見到導演、收音人員開工著哂燕尾禮服！
又有一幕梅姨要做演講，廳內觀眾唔係臨演而係真乘客，一心入場聽作家分享寫作心得！梅姨話呢一幕都係無稿嘅，演講內容全靠同編劇互相拋橋，搜集人物傳記資料而寫成，所以上場演講時超緊張！
Let Them All Talk順住故事時序拍攝，演員們順應故事度對白俾反應，3位資深戲骨話晚晚都為準備下一場戲搞到無覺好瞓，仲要捉住編劇討論角色情緒。唔止對白要自己度，梅姨仲話連戲服都要自己準備，出動私伙衫褲鞋襪，務求將自己與角色融為一體！
雖然無對白本，不過套戲神奇地只係用咗短短2個星期就拍好，足見幕前幕後位位功力深厚，平日準備功夫做到足，先可以即興爆肚又可以一take過搞掂！
更多電影文章
【電影LOL】今個星期睇咩戲 《鬼滅之刃劇場版》《屠．姐上錯身》《親愛的房客》《靚太軍樂團》
【電影LOL】《鬼滅之刃劇場版》香港開畫收過300萬 鍊贏大片《天能》做年度開畫冠軍
【電影LOL】「戰狼」吳京出征荷里活 同Chris Pratt演保鏢邊打邊搞笑
