雅虎香港新聞 【電影LOL】《鬼滅之刃劇場版》香港開畫收過300萬 鍊贏大片《天能》做年度開畫冠軍
日本動漫片《鬼滅之刃劇場版 無限列車篇》風頭超勁，之前同大家介紹過呢套戲喺日本破咗無數票房紀錄，快過大師宮崎駿《崖上的波兒》破百億日元票房紀錄，現時為日本史上票房第5位電影！
接落嚟就係挑戰連美國都要翻拍成真人版嘅《你的名字》及瘋魔全球細路嘅《魔雪奇緣》票房紀錄！較早前台灣上映時，《鬼》一樣創下驕人紀錄，3日收過億台幣打破《魔雪奇緣》喺台灣創下嘅紀錄！
估唔到嚟到香港，即使疫情籠罩，戲院入場人數受限，社會氣氛壓抑嘅情況下一樣高開，開畫首日共放映840場，票房高收超過300萬，勁過基斯杜化路蘭套《天能Tenet》！
咁各大院線亦好俾力，當《鬼》係Marvel超級英雄大片咁排，一早開預售，又開哂IMAX廳，場次洗版咁又多又密，平均15至30分鐘開一場，單係今日星期五就排超過860場，比起另一套新上畫嘅《屠．姐上錯身》（今日約190場）多4倍！
而上一套巨片《天能Tenet》，導演路蘭為咗打救死寂戲院業界，無視出品公司華納嘅反對，堅持於9月初上映，用埋IMAX機拍攝嘅《天》主打震撼影象，院商當時亦一樣大開IMAX廳同做哂預售，加上咁多個月無荷里活鉅製上映，觀眾餓咗好耐。埋單《天》開畫成績250萬相當不俗，即刻成為年度開畫冠軍，可惜2個月就被《鬼》以300萬取代！
香港最高票房日本電影、勁收4600萬嘅《Stand By Me:多啦A夢》上2015農曆年賀歲檔，當時無任何疫情人數管制措施，兼且因為過年暫停哂所有戲票優惠，首日票房都係收320萬左右。《鬼滅之刃》如果可以全院滿座同收足正價，絕對勁過《Stand By Me:多啦A夢》開畫紀錄！
《鬼》開畫氣勢一時無兩，後勁有幾凌厲，取唔取代到《Stand By Me》成為香港最賣座嘅日本電影就要睇埋今個周末先知。
今年經過新冠疫情洗禮，觀眾觀影習慣勢必有變，荷里活大片廠出品都唔一定有票房保証。戲好，無論咩語言、形式都會得到認同，希望疫情快啲過去，可以安安心心喺大銀幕睇好戲！
更多電影文章
【電影LOL】今個星期睇咩戲 《鬼滅之刃劇場版》《屠．姐上錯身》《親愛的房客》《靚太軍樂團》
【電影LOL】「戰狼」吳京出征荷里活 同Chris Pratt演保鏢邊打邊搞笑
【電影LOL】《后翼棄兵》女主角 Anya Taylor-Joy 落街放狗被發掘嘅上位女星
