雅虎香港新聞 【電影LOL】脫離皇室自立 哈里同梅根簽Netflix拍片賺1億美金
英國王子伉儷哈里及梅根脫半年前離開皇室自立，無咗條大水喉後積極搵銀，2位終於搵到新工，就係做荷里活製片人！根據New York Times嘅報導，哈里同梅根將會成立製作公司，並會製作紀錄片、電影、綜藝節目及兒童節目等，而背後金主就係串流平台大哥Netflix!
相信計劃仲係初步階段，因為間製作公司連名都未有，不過相信Netflix睇準佢地「前皇室成員」嘅名氣，就算無製片人經驗，都一樣大灑金錢同哈里梅根簽下數年合約。而梅根講到明無意復出做幕前，轉而專心幕後製作。
哈里及梅根就合作一事表示「我咃將會主力創作正面、帶有希望嘅節目內容，作為新手父母，製作啟發性嘅家庭節目同樣重要。」節目將會獨家於Netflix播放，一邊有名氣，另一邊需要大量節目，呢單可謂雙贏。
有傳近月，哈里同梅根密密約見各大公司，除咗Netflix外，仲先後見咗迪士尼、Apple及NBCUniversal，幾間公司都表示有興趣，有競爭自然有價。梅根只係做過幕前拍過下劇，哈里更加無相關節目製作經驗，大家都好奇到底Netflix會俾幾多簽約費。Netflix發言人拒絕透露金額，不過行內人估計，單係「皇室成員做返普通人進軍荷里活」呢個噱頭已經值1億美金！
最後落實簽約Netflix，其實早有端倪。上星期Netflix推出紀錄片Rising Phoenix，就有哈里王子身影，加上前車可鑑， 前美國總統奧巴馬都係同Netflix簽約，製作紀錄片《美國工廠》成效不俗，配合埋Netflix平台強勁嘅訂閱人數、業務遍佈全球，同Netflix簽約屬穩陣之選！
約就簽咗，都要交貨，希望2位前皇室成員製作出有質素節目！
更多電影文章
【電影LOL】Netflix為跑數 開放免費內容 《生化危機》改編拍電視劇
【電影LOL．地道鬼節影院】《熱血青年》救人變成害人 恐怖女鬼原來係港姐
