雅虎香港新聞 【移民韓國】韓國都有投資移民 仲可以買磚頭！
韓國係港人出門旅行熱點之一，哈韓族想移民韓國，除了打工結婚，更簡易途徑係投資移民。
五億韓圜上車門檻
韓國投資移民賣點係上車門檻很清晰，三大選擇公益事業項目、房地產投資項目及落後地區開發事業項目，入場費門檻都係五億韓圜。五億這個數似乎很嚇人，但其實只係相當於約359萬港元，買一個新界西居屋單位都未必夠。
先講公益事業項目，申請人向韓國政府法務部指定投資項目投資五億韓圜，55歲以上擁有三億韓圜申請人投資額可減至三億韓圜（約217萬港元），確認投資後即可獲得F-2居留資格，可以在韓國工作、居留及學習，完成五年投資期後即可享永居權。公益事業項目另一賣點係雖然無利息，但完成五年投資期後，申請人可取回投資本金，換言之即係有保本保證。
房地產係最受港人歡迎的投資移民項目，不過韓國投資移民的房地產項目，並非買入韓國心水物業就可以達標。申請人必須投資5億圜或以上於指定房地產項目，從官網列出資料，項目一般為酒店式住宅、別墅或渡假村，並位處首爾以外地區如京畿道、釜山、濟州、大邱，投資期內亦不能將物業轉按、出租及賣買，違例者即會失去F-2居留資格，完成五年投資期後即可享永居權。
至於落後地區開發事業項目算係另類之選，申請人投資5億圜或以上於韓國政府法務部與相關部門協議後的指定落後地區項目，確認投資後即可獲得F-2居留資格，完成五年投資期後即可享永居權。現時在官網只有六個項目選擇，涵蓋主題公園、渡假村、文化旅遊區等振興地區經濟建設項目。但要留意落後地區開發事業項目沒有保本保證，投資者既要有冒險精神又要對相關項目有深入了解。
韓國投資移民還有幾項賣點，首先係不設申請費，申請人只須要支付簽證及外國人登錄證申請費；二係毋須經中介申請，申請人可以到位於仁川機場全球人才簽證中心，透過一站式服務逐步完成事前審查、開設帳戶匯入資金、確認投資項目及簽發F-2居留簽證及滿五年轉永居等程序；三是申請人可攜同配偶及子女到韓國工作、居留及學習；四是每年入境一次即可維持F-2居留簽證。
選擇韓國要考慮……
香港拎得出幾球「閒錢」家庭多的是，似乎韓國投資移民都有一定吸引力。無疑韓國投資移民提供一項拎多個永居權的方便途徑，但講到全家搬到韓國居住，就要考慮語言、工作及學習三大因素。
唔少哈韓過來人都表示，雖然唔太識韓文都可以勉強在韓國生活，但落腳後他們都係努力學韓文，否則長遠而言都克服唔到生活上的不便。更何況房地產投資主要圍繞首爾以外地方，唔使韓文就更難生活。
至於工作，韓國雖然多年前已推行五天工作制，但韓國職場出名難捱，除了工時長、星期六日返工係等閒事，放工後要陪老細及同事應酬，對港人而言都係難關。即使你決心創業，為了生意亦難以擺脫工時長及無間斷應酬生活。
對父母而言，子女在韓國讀書亦係另一大心理關口。韓國一年一度「大學修學能力試驗」，論競爭激烈較香港公開試誇張得多，甚至一個人的大半世人發展都係靠這個試決定。擔心子女在香港考DES壓力大，想移民韓國就更要認真考慮讀書這項因素了。
另外取得永居後想申請入籍，亦要面對出名難考的入籍考試，考試範圍涵蓋歷史、國歌、文化、文學及法律，近年更有風聲指要進一步提升考試難度，所以不要單單因為投資移民計劃具彈性，就輕視了到韓國居住的難度。
【下載Yahoo財經APP】獲全球超過1700萬人信任的美股投資工具，跨平台同步你的投資組合，一APP掌握TSLA、AAPL、AMZN等美股最新走勢。
伸延閱讀：
