食咗檸檬都唔知？5種被拒絕嘅暗示

去到今時今日，仲有冇人話女仔一定要被動，唔可以主動出擊追男仔？如果你仍然抱有呢種心態，咁呢篇文唔會啱你睇，可以出返出去慳番5分鐘。當然，我指嘅女追男都係指慢慢從朋友開始入手，今男方開始Get到妳對佢都有心意，因為有時候男仔仲怕醜過女仔，如果無女仔一啲明示暗示推佢一把，真係踢極都唔郁㗎！不過，如果男方都有意思，就當然順理成章可以一齊發展落去睇下夾唔夾到，但有時候可能男方已經落晒閘，暗示同妳無可能，如果妳呢個時候仲唔醒水，覺得「佢可能係怕醜啫」，仲要唔知情識趣咁繼續主動落去，就恐怕會被人冠上「死纏爛打」嘅污名喇！有風度嘅男仔為保女士面子，通常唔會直接話妳知無行，但如果佢哋有做過以下幾個行為，妳就知妳已經「被拒絕」喇傻豬！

已讀不回
如果啱啱認識，好自然會用Whatsapp傾下計，但如果妳發現每次都係要由妳自己開始先，而對方只回一、兩句就唔覆，好明顯就無興趣啦；另外如果係同事，佢只覆公司事唔覆私人事就更加明顯地話妳知「我只係想同妳有同事關係咋」。

「好呀再約」
如果妳係直接主動型，唔浪費時間直接約佢去食個飯或者睇套戲，作為有風度嘅男士，斷估唔會一口拒絕：「唔去。」但為咗令妳好落台，通常會應承，不過唔會主動定日子，只會話「再約」，如果妳提出日子，佢就會再推「我睇下啲時間先。」總之諸多推搪，拖延戰術。

放飛機
好喇，就算佢真係拖無可拖而應承咗，同妳約定好，但好可能喺約會前幾日就會忽然話妳知佢臨時有要事，需要改期，然後又重覆上面第二點咁不斷Loop；第一次就話可能真係有要事，連續第二次會唔會太啱呀？！

唔收禮物
呢樣嘢真係玩死唔少女仔，因為好多時候妳準備好禮物，都未去到手織頸巾、DIY飯盒呢類「隆重禮物」，可能只不過係一個10蚊20蚊嘅扭蛋，如果對方都婉拒唔收，唔係代表佢有風度唔貪心，係代表佢唔想妳抱有任何希望咋。

朋友放風
妳經常有意無意之間會聽到佢話已經有心儀對象，又或者聽到佢話目前唔想拍拖、事業為重之類嘅說話，妳以為真係咁啱聽到咩？少年妳太年輕了，其實係佢意識到妳有意思，所以晨早放定風畀妳知，等妳知難而退咋