香港夜繽紛｜戲院推夜場優惠觀眾憂冇車搭 黃百鳴指可以搭的士 網民：的士錢仲貴過戲飛錢

日前香港政府宣布開展「香港夜繽紛」活動，有多項娛樂活動及優惠吸引市民及遊客，希望可以刺激夜間經濟，當中包括部分戲院推出夜場購票優惠，百老匯全線戲院9點後票價劃一為$50，有分院更推出$35午夜場優惠。身為著名電影製作人嘅黃百鳴喺噚晚（19日）出席電影《孤注一擲》首映，接受傳媒訪問時回應呢個優惠，不過就引起網民反感，認為佢非常離地。

黃百鳴接受傳媒訪問時表示因為疫情嘅關係大家已經習慣喺屋企睇戲，80年代嘅午夜場好多人睇，而家唔好話午夜場，連九點半之後嘅場次都冇人，所以佢認為政府可以做多啲呢啲活動，令到觀眾習慣返去戲院睇戲，而10月1號所有戲院場次半價，希望可以帶動到觀眾入場。被問到有觀眾認為睇完午夜場要趕搭尾班車，甚至冇車搭返屋企會得不償失，黃百鳴就話80年代都冇地鐵搭，可以坐的士，所以當時的士嘅生意好好，甚至連午夜場門口嘅攤檔都好好生意，其實有觀眾就自然會有交通。另外，佢仲話疫情期間比較少「大片」，不過而家「大片」已經慢慢回歸，希望可以成功吸引觀眾入場睇戲，

對於黃百鳴指睇完午夜場搭的士返屋企，唔少網民都議論紛紛，更有網民認為佢離地，留言「行返屋企咪得，再唔係訓公園，老麥 幾多選擇」、「的士錢仲貴過戲飛錢」、「會貪你35蚊戲飛既人會唔會捨得搭的士」、「咁我做乜夜晚睇？」、「買200回10蚊，50蚊消費券要使500先用得，然後叫人幾百蚊的士返屋企，呢啲唔係弱智可以形容」、「不如話夜左冇車咪住一晚酒店當staycation」、「貪半價n車都唔會搭啦 何況搭的士？」、「咁咪即是無平到 有無腦？貪你張平戲飛，然後的士度扣返」、「唔想搭的士咪去附近買層樓住 帶動埋房地產」、「佢真係唔係扮 係完全脫晒節 大佬都諗一諗先開口丫 80年代啲戲院數量都唔同啦 全盛期大大細細加埋好似成百間 屋企樓下可能已經有 咁咪可以用行嘅或者踩下單車已經返到屋企 排片又集中 唔使一定話要跨區睇 佢思維真心完全冇向前過 以搞創作嘅人嚟講連呢啲都聯想唔起咁 仲點搞電影」、「不如話個個揸車啦」、「訓街啦不如」及「咁我早啲訓，早啲起身睇早場好過」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！