香港小姐2024丨決賽冠亞季軍名單出爐 全女班主持被指又悶又嘈 網民撐「一女星」靚到自動當選

《2024香港小姐競選》決賽昨晚（15日）圓滿結束，冠軍、亞軍、季軍、「最上鏡小姐」以及「友誼小姐」等獎項塵埃落定，2號倪樂琳（Ellyn）以大熱姿態勇奪港姐冠軍，11號梁嘉莹（Emily）榮獲亞軍及「最上鏡小姐」，成雙料亞軍；季軍則由14號楊梓瑤（Amina）奪得，同時獲得「才藝女神大獎」、「智囊百選女神大獎」獎項，3號王汛文（Candice）就奪得「友誼小姐」。今年港姐以「Proud To Be A Woman」作口號，一班佳麗於歐陸式圖書館設計嘅舞台爭奪后冠，大批網民都喺網上邊睇邊討論。下文整理全晚港姐賽事嘅精彩重點。

香港小姐2024丨1. 全女班陣容 網民大呻好悶
今屆香港小姐競選係史上首次採用全女班陣容，司儀和評判都係女性，分別由陳貝兒、麥美恩、何沛珈、陳懿德及莊子璇擔任司儀，組合相當新鮮，而且五人之中僅陳貝兒唔係選美出身。不過，唔少網民覺得全女班司儀好悶、好嘈，唔及以往有氣氛：「以前有Do姐還好」、「懷念以前叻哥、志偉、崔健邦、森美做司儀」、「呢d（啲）節目搵阿叻，鄭中基呢d有節目效果好多」、「班女司儀好吵，放棄，睇黃viu未睇嘅劇加睇youtube!」、「今屆香港小姐選舉全女班司儀得過嘈字好炒耳，請加以正視」、「其實我只係睇咗大半個鐘，真係頂唔緊，太嘈」、「搵女人做司儀唔識搞氣氛」、「頭先個主持話女性要征服世界，聽到呆咗」等等。

香港小姐2024丨2. 問答環節問題未夠刁鑽
問答環節係考驗佳麗智慧同急才，不過有網民覺得由全女班司儀去問問題未夠刁鑽，留言：「無153問啲尖銳問題係悶啲」、「問咪啲野都好正路，講句野都要好典雅咁，悶到癲」等等。不過，10號吳芷靖被問到「如果TVB委託你同汪阿姐講要炒佢，你會點同佢講」一題，鏡頭即影住汪明荃，汪明荃亦表示：「係囉，你係咪有同嘢同我講？」吳芷靖經麥美恩慫恿下叫汪明荃休息一陣，不過之後就不斷道歉，相當搞笑。

香港小姐2024丨3. 網民對評判團有意見
五位司儀出場後隨即介紹今屆港姐評審團分別為周梁淑怡、汪明荃、何超鳳、彭韻僖及葉楊詩明，而曹敏莉、陳法蓉、朱凱婷、翁嘉穗及劉倩婷則為「最上鏡小姐」擔任評判。網民對評判團似乎有啲意見，表示唔係好認識佢哋：「個個評判啲樣都好惡」、「呢D（啲）評判有乜代表性」等等。

香港小姐2024丨4. 佳麗廣東話唔正 被批選「譚仔小姐」
4強佳麗（2號倪樂琳、10號吳芷靖、11號梁嘉莹和14號楊梓瑤）於辯論環節分別討論「香港應該設立『男女共用廁所』」和「『分居婚姻』應該在香港推行」問題，不過有三位佳麗廣東話都唔正，網民嘲笑係咪選「譚仔小姐」：「唔識廣東話點代表香港」、「鬼食泥10號」、「全部譚仔出黎」、「去選譚仔小姐啦」、「有邊個係識廣東話」、「無字幕聽唔明」、「唔開口就冇事囉，一開口就譚仔腩肉」、「啲鄉音搞唔掂」等等。

香港小姐2024丨5. 葉蒨文闊別港姐舞台逾20年 與新生代帶來表演
今屆港姐邀請到闊別港姐舞台超過20年嘅重量級表演嘉賓葉蒨文，與《聲夢傳奇2》代表黃洛妍、趙紫諾、劉詠彤、趙頌宜、《校園好聲音—唱響中國》冠軍洪心怡、女團XiX成員楊秉頤、繆昀希及良玳瑩獻唱及勁歌熱舞，狀態超Fit，網民又大讚表演勁好睇。TVB高層曾志偉透露係葉蒨文要求與年輕歌手合作，並要求音響、燈光、排舞師等所有嘢都要最好。

香港小姐2024丨6. 網民撐鍾柔美靚到自動當選
《2024香港小姐競選》由JW王灝兒、鍾柔美（Yumi）、詹天文（Windy）獻唱今屆香港小姐主題曲《Proud To Be A Woman》揭開席幕，鍾柔美著上白色短款禮服亮相，被網民大讚完勝一班佳麗：「yumi對腳正到」、「唔洗選啦Yumi冠軍」、「2024香港小姐冠軍鍾！柔！美！」、「去選贏晒」、「直接宣布yumi冠軍算」等等。

香港小姐2024丨7. 麥美恩被讚「最佳主持」
麥美恩被讚主持功力最出色，可以控制到個場，避免有dead air情況出現：「所以呢個先算係『最佳主持』嘅得獎者，真係用個心去做的」、「我都係睇左last果十幾廿分鐘，咁多個女主持睇到mayannem好努力去hold住個場」、「Mayannem真係成熟了很多，依家能夠控制都整個大場面了」等等。又有網民大讚麥美恩見到冠軍倪樂琳個后冠歪咗而主動幫忙極貼心：「我淨係留意到麥美恩係最好嗰個，個冠軍后冠戴歪咗，佢係第一個走出去幫佢戴返好個后冠，呢個moment對冠軍嚟講好重要，個后冠歪咗真係好影響的，麥美恩見到即走出嚟幫佢，睇得出佢真係個好善良嘅女仔」、「仲要跑住去扶佢坐底同整理返晒，我媽一睇到mayannem就狂讚」等等。不過亦有網民認為佢把聲好嘈及趕客，留言話：「麥美恩嘈到令人感到煩躁 ， 立即轉台」及「又嘈又掙（爭）野講,每一句尾都拖長咁叫」 等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！