黃智雯下廚亂嚟 被趙希洛喝停

東方日報
·2 分鐘文章
趙希洛(左)與黃智雯Chok甫,準備大展廚藝!
趙希洛(左)與黃智雯Chok甫,準備大展廚藝!

藝人黃智雯與「閨蜜」趙希洛相識14載,性格一凹一凸,非常啱嘴形,兩姊妹趁農曆新年學做賢妻炮製齋菜,不過論廚藝,智雯似乎較為遜色,表現論盡,更因落鑊先後次序問題,一度被對方喝停,場面搞笑!

黃智雯與趙希洛(Candice)當年因參選港姐而熟落,升呢為好姊妹,雖然各自有另一半,但兩人感情仍好到不得了。踏入牛年,廚藝了得的Candice孖住智雯下廚,起初炮製「撈起」時也有板有眼,不過之後合力製作「富貴卷」便見真章,智雯把大量餡料放於腐皮上,儼如糯米雞般,其後眼見Candice分批把卷物落鑊炸,她一度想中途插入,把餘下的卷物融入完成品中,Candice見狀即場喝止,令她隨即笠水敗走。

事後智雯笑指平日一起出埠旅遊時,大多由Candice下廚,自己僅需飯來張口:「佢好識照顧人,對食又有要求,亦清楚我飲食習慣,所以多數都係佢搞,我就冇咩耐性,咪教番佢用氣炸鍋。(平時有冇煮畀男友食?)都有,其實心意都好重要,佢應該冇投訴。」

想李施嬅帶闖荷里活

談到與男友拍拖多年,智雯坦言正朝結婚方向,男友亦已成為家人一部分,所以僅欠一紙婚書:「傳統嘢屋企人冇畀壓力,不過到時未必大排筵席,人馬座好隨心,最重要係佢對我同家人都好好。(去外國結婚?)喺外國感覺開心啲,到時結咗婚應該呃唔到大家。」而一直低調感情事的Candice,則幻想另一半於巴黎鐵塔下求婚。

工作方面,智雯將蓄勢待發迎接新突破,更賣關子說:「除咗拍劇,仲會有同音樂有關嘅計劃,但要睇疫情嘅變化而定。」Candice則表示想參與音樂舞台劇及電影,還想衝出香港:「以前喺學校玩舞台劇用英文講,希望有機會嘗試吓接觸外國嘅製作,唔知李施嬅可唔可以帶我入荷里活呢?」

兩人夾手夾腳包「富貴卷」。
兩人夾手夾腳包「富貴卷」。
炸食物時,黃智雯被趙希洛喝停。
炸食物時,黃智雯被趙希洛喝停。