黃秋生尋父親多年 集網民力量終有消息

57歲嘅影帝黃秋生擁有深邃嘅五官，雖然佢個樣有混血嘅感覺，不過就唔係好多人知佢係一位中英混血兒。

秋生爸爸係英國人Frederick William Perry, 喺港英時代香港政府嘅英國高官公務員，而秋生出世後就跟媽媽姓黃。秋生爸爸喺佢4歲時就離開咗佢媽媽同佢，後來媽媽為咗生活再婚，而佢同後父關係唔好，六歲開始入讀寄宿學校。佢勉強讀到中三，畢業後做過好多份工，後來佢同朋友一齊去考麗的培訓班，做左兩年藝員，再去考演藝學院，經過多年努力成為影帝。

早前佢接受BBC訪問時提及到當年被爸爸遺棄嘅悲慘童年，亦有提到佢喺1997年去英國跟法國大師學演戲時帶埋媽媽去英國「尋根」，但最後咩都搵唔到。

秋生「尋根」一事引起網民關注，喺噚日凌晨秋生喺Facebook留言話有人搵到一啲關於佢爸爸嘅資料，有爸爸嘅出生日期1914年6月11日，元配個名，及與元配所生嘅一女兩仔資料。

另外，有網民搵到一張屬於Frederick William Perry英國人嘅澳洲入境證，據入境證顯示，Frederick於1966年4月7日到澳洲生活。而秋生亦證實張入境證係真嘅。唔少網民都留言祝福佢，希望佢可以盡快搵到佢爸爸。網民計算秋生爸爸都已經103歲，估計佢已經唔在生。