龍婷由西洋菜街唱出名堂 同《中年好聲音》丁文俊傳緋聞極速落閘派好人卡

憑《中年好聲音》成功入屋嘅龍婷，尋日驚傳同已婚演唱會製作人丘亞葵喺車上激咀，仲食飯睇戲直落。後來丘亞葵回覆傳媒表示「激咀」只係朋友式嘅Hello Kiss，錫咗一啖面，而龍婷所屬嘅TVB Music Group就發聲明澄清龍婷同丘亞葵只係多年好友。

喺街頭演唱打出名堂嘅龍婷被fans稱為「小龍女」，本來同小龍女一樣玉潔冰清冇咩緋聞，估唔到會俾周刊影到，難怪成為網路熱話！

生於瀋陽嘅龍婷，少年時曾經學舞蹈，十六歲去廣東省中山實習時，因為聽到陳慧嫻嘅《飄雪》而決定留低，並且轉行唱歌表演。後來龍婷移居香港，2017年開始喺旺角西洋菜街行人專用區表演，因為聲線似鄧麗君，演出片段被放上網而為人認識，「小龍女」呢個名就係嗰時彈出嚟。不過唱咗一年幾就遇到「殺街」，街頭演出被叫停，而龍婷曾經跟隨所屬歌舞團去酒樓演出。「殺街」無阻龍婷嘅人氣，更因為喺「菜街」嘅演出而被邀請上《流行經典50年》演唱。後來龍婷自己開公司發展音樂事業，會「轉場」到中環busking，2018年更加喺九展Music Zone開個唱，前年甚至喺西九戲曲中心開show，當時仲要未參加《中年好聲音》。

龍婷參加過唔少歌唱比賽，2019年參加中央電視台嘅《星光大道》更成為總冠軍，並因此有機會參加央視春晚。演出之外，龍婷亦會自資製作新歌，原來佢由2019年至今已經推出咗廿幾首單曲，勤力過唔少歌手。

2020年4月新冠疫情初期，TVB《東張西望》播出龍婷喺中環busking嘅網上影片，有觀眾聚集聽歌，主持聲稱係防疫「限聚令」實施後拍攝，從而指出有市民罔顧規例。龍婷喺節目播出當晚就發聲明澄清，指TVB播嘅片段係喺「限聚令」生效前2周所拍，而佢從未喺「限聚令」實施後作街頭表演。結果《東張西望》第2日節目尾聲作出澄清以及道歉。

《中年好聲音》嘅合唱賽安排龍婷同另一參賽者丁文俊合唱《因為愛情》之後，被其他參加者「煲水」助攻傳緋聞，甚至迫佢地拖手唱歌，TVB宣傳平台仲拍片分頭訪問佢地，睇得出好尷！而龍婷受訪時把握機會派「好人卡」俾丁文俊，落閘之餘仲保持形象乾淨。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！