49歲TVB綠葉王戴耀明年尾結婚 唔會搵女神佘詩曼觀禮

早前TVB節目《360秒人生課堂》搵戴耀明（小明）做其中一位主講者，講到做咗多年綠葉都係俾人叫「茄喱啡」，而且覺得未能帶阿媽去電視城一日遊好遺憾，又提到阿媽希望49歲嘅小明快啲成家立室。節目出街後唔少人都好感動。

最近戴耀明接受訪問時提到，已經同前女友復合一排，並打算年尾結婚！

小明同圈外富貴女友11年前認識，之後拍咗五六年拖，但後期成日為小事嘈交，因此決定分開。不過佢地做到「分開仲係朋友」境界，幾年來互相關懷扶持猶如家人一樣。早排小明以為患骨癌，等化驗結果時飽受煎熬，搵前女友傾訴，講講下突然有共識，如果冇事就不如共度餘生。

戴耀明認為復合到結婚都係上天安排，而家計劃婚禮細節，打算一切從簡，日子視乎疫情而定，應該係年底至明年初。被問到會唔會請前暗戀對象佘詩曼出席觀禮，小明就話唔會喇，費事好似玩咁。

小明曾經公開表示，多年前因為拍劇而認識阿佘，並暗戀對方長達16年！甚至試過借醉send短訊話「好掛住你」，又同阿佘講賺到錢會娶佢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！