Alton@MIRROR揭受粉絲私追困擾 發文怒轟：越嚟越肆無忌憚

粉絲追偶像本是正常事，不過近年愈來愈多粉絲「私追」喜愛的明星，令其工作及私生活受影響，造成不良景象。MIRROR成員「王勁」王智德（Alton）於Threads撰文抒發感受，大談「私追」行為所帶來的影響。

Alton日前在Threads說：「一句講晒: 你冇犯法，不過就好冇禮貌同好自私，你而家影響我(同團隊)做野呀。」帖文一岀，隨即引起很多網民關注和討論，且一同猜度是甚麼事。

Alton其後撰寫長文：「講多少少免招猜度，好多人劈頭第一句就問我係咪好討厭私追，呢個轉頭先，我想講嘅係個”行為”而唔係個”身份”。

有一次外景，有人就揸住支大炮係咁喺度影，一開頭有工作人員勸阻，然後收埋咗一陣隔冇耐又拎出嚟，週而復始。最大嘅問題係影響演員休息(呢一點唔多解釋，相信冇乜人接受到每分每秒可以俾個鏡頭影住，紀錄片除外。)

跟住呢，企到咁埋Roll機又會影到佢(哋)，同事們將啲架生左搬右搬已經好辛苦，仲要浪費人力時間過嚟請佢(哋)離開，轉個頭又返返嚟，最慘係我哋追緊日落。另外一個問題，返到去條片點樣剪？一個鏡頭望落去見到有啲戴帽戴口罩拎住相機以為自己透明嘅人，會唔會突兀先。

有人就係睇準你唔敢出聲，越嚟越肆無忌憚，始終佢哋抱住”只想拎到自己想要嘅嘢”嘅心態，耍無賴好容易。私唔私追都唔係重點，你有禮貌、識互相尊重嘅話，行過路過 chill 下傾下偈，其實我會好開心(喺街度撞過我嘅人應該知)。

上一則 threads 之後，多少都有啲波浪，不過開得聲就衡量過，只不過我更相信件事係要正視，畢竟面對呢個問題嘅係團隊同大家，唔只係我。呢個年代咁多渠道表達自己，不如講吓個真實情況俾大家聽，俾大家了解多啲，」

他於留言位置補充：

「唔好再俾無知控制。

我只係一個小薯，

盡人事表達，

盲目包容係解決唔到問題，

諗下自己可以做啲乜，

其實有時候講嚟都係過我自己，

講完個世界未必會即刻變，

但至少叫自己講過，

之後就莫強求，

不再回應。

加油啦。」