Coffee林芊妤回應老公食軟飯傳聞 澄清老公養得起自己：好開心可以賺錢買花戴

林芊妤（Coffee）離開TVB後轉行做YouTuber及瑜伽導師，YouTube頻道累積逾百萬訂閱。Coffee於2018年與任職銀行高層嘅澳洲籍馬來西亞華人翟志榮結婚，並誕下翟德彥（伯伯），亦於2020年推出自家瑜珈服品牌，可謂事業愛情兩得意。不過，Coffee不時有負面新聞傳出，繼被KOL影射婚後出席富豪飯局，日前又被傳老公「食軟飯」，令Coffee於近日人氣社交平台Threads撰文回應，被網民大讚表現大方。

Coffee曾經分享結婚後老公對佢好好，又鼓勵佢追求夢想，二人財政獨立，平起平坐，指自己努力賺錢自己用，不過仍傳出老公「食軟飯」之說法。Coffee表示其實一開始新聞係話佢成功釣到金龜：「噚日喺度同老公講笑，講起之前有人話佢『食軟飯』，我突然醒起當初大家知道咗我要結婚嘅時候，有傳媒知道佢係銀行高層，出咗新聞話我嫁畀銀行家。跟住當時好多人話我貪慕虛榮，終於畀我成功釣到金龜，之後仲傳我開公司都係老公打本畀我做先開到（其實開公司唔使好多錢）。到而家大家都知道，我係靠自己開公司做生意，呢幾年仲做得幾好，就開始有人話佢『食軟飯』，要靠老婆。」

對於傳聞，Coffee得啖笑，又為老公澄清，指老公養得起自己，可以選擇唔工作，只係佢自己選擇工作，又勉勵女士們唔好太介意人哋嘅閒言閒語：「所以大家就算生活上遇上別人閒言閒語，都唔使太計較，因為人只會好主觀去睇一件事。咁好似我嘅例子，點解事情就只能有咁極端兩面？一係就我貪慕虛榮，如果唔係我老公就係『食軟飯』？講真，老公當然養得起我，我的確可以選擇唔工作，好好相夫教子，其實女人想好好靠自己努力闖出一片天，都係一個個人選擇，我好開心自己可以賺錢買花戴，未來自己控制到，我可以好自信地講，就算有一日發生咩事，我依然有能力照顧到彥彥，我可以決定幾時想買就買、幾時想食就食。想帶自己爸爸媽媽屋企人去旅行，我唔使徵求老公金錢上嘅同意。」

Coffee又補充指，女人喺任何階段都要不停自我增值，自己嘅人生僅需向自己交代：「女人喺任何階段都要不停自我增值，而家嘅網絡世界就算足不出戶，都可以學到好多知識，千祈唔可以同呢個世界脫節，我哋一齊活到老學到老，加油。所以當有人去評論你嘅人生，請你好好記住，如果你因為人哋嘅睇法而改變自己，你過嘅係佢想要嘅生活，並唔係你想要嘅生活。每個人都有自己嘅選擇，而你嘅選擇都唔需要向任何人交代，你嘅人生你只需要向自己交代。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！