社交平台出PO同大家講再見 黃秋生：我從來都唔係港獨，亦唔喜歡暴力

一向敢言嘅黃秋生，經常喺社交網站發文寫自己嘅感受或對社會事件發表意見。喺今朝，佢喺Facebook出PO話自己好攰，要同大家講再見，仲強調自己唔係港獨份子，希望中港兩地嘅人可以再次和諧相處，最後佢仲用上簡體字寫明蝗蟲唔係佢講嘅：「各位，我癐（攰）啦。再見。喜歡我嘅朋友唔駛担（擔）心，我唔係去死，我會堅持信念，大家都係，大丈夫有所為有所不為。我只係癐（攰）啫。痛恨我嘅朋友，係，係朋友，我唔憎你哋，因為我都唔識你哋，你哋對我亦無任何影響，我只係因為私人原因，疲倦而已，你哋亦唔駛高興，因為你哋並無成功咗啲乜。喺呢度，大家平等，互不相識，缘生則聚，緣滅則散，你我只係宇宙間嘅粉塵。只願，中港两（兩）地嘅人，可以好似以前一樣，再次和諧相處，歡聚圍爐。最後，我從來都唔係港獨，亦唔喜歡暴力，同大多數人一樣。我只係一個有獨立思想，喜愛知識，而且憎惡邪惡嘅普通香港人。 其實，内地都有好多聰明俊秀嘅人材。还有，蝗虫不是我说的，我寫的那句是文言，不懂别亂说，蝗虫是一个導演罵的，而且他现在还在大陸，看似挺受你們欢迎的在捞你們的金呢。 香港人，加油。」

短短幾小時，秋生呢個PO已經吸引超過1萬6千幾位網民俾情緒回應，並紛紛留言支持佢話：「秋生哥，加油! 感謝您身為公衆人物依然敢言，一直不平則鳴。感謝!」、「秋生哥～感謝你的敢言～香港有你真好～祝福你一切順利～保重～有緣再見！」、「秋生哥，真香港人！唔止係影帝級嘅演員，更係一位藝術家！謝謝你分享想法！謝謝你🙏休息是為了行更遠的路！秋生哥，加油！香港，加油💪」、「除左係一位獨立思考，喜愛知識之外，你更是能夠分辨是非黑白，有良知既藝能界人士！感謝你」及「👍🏻support💪🏻 秋生哥 加油💪🏻」等等。