Gareth.T出PO力數四個廣東歌行得慢原因 網民反指：要聽眾改變口味去迎合你？

現年23歲嘅Gareth.T湯令山，擅長作曲填詞兼唱歌，歌曲《Boyfriend Material》及《勁浪漫超温馨》大受樂迷歡迎，被喻為「樂壇潛力股」。近日佢喺社交平台Threads出PO力數4個令廣東歌行得慢的嘅原因，隨即引起網民熱烈討論。

近日Gareth.T喺Threads出PO力數4個令廣東歌行得慢嘅原因，包括咬字太重要、歌手唔夠cool、聽眾需要教育及聽眾根本唔需要行得前嘅音樂/不同類型嘅音樂，之後佢仲叫網民留言寫低仲有啲咩原因。唔少網民都紛紛留言寫下原因，例如「冇真正權威嘅頒獎禮，歌手對獎項冇概念」、「市場太細」、「會唔會係因為普遍大公司上中層比較保守，視野亦唔夠闊，好多時都打穩陣牌，因而積落好多問題。呢樣其實影視都面對差唔多情況，當然市場細都係一大原因。」、「曲風變化少，千篇一律」、「5.Vocal tuning 6.Groovy咁唱廣東歌 難度增加 7.單曲咁做 要做隻食糊先 曲風會保守 8.未認識Gareth嘅歌」、「5.經典難以超越 6.所謂頂流實力不夠 7.資源要投給值得的人」、「廣東話本身就先天不足，尤其發音太多限制，根本唔適合用嚟唱」、「觀眾好保守，十年不變，認為唱嗰個只係負責唱，唔欣賞作品嘅多元化」及「依家啲𡃁仔／𡃁妹太崇韓，根本唔會聽廣東歌同覺得老土」等等。

雖然Gareth T.嘅Threads得到唔少網民支持，不過連登討論區嘅網民就唔同意，仲認為佢係不甘女友Moon Tang被MC助手Yee Yee指咬字難頂而借題發揮；亦有網民指Gareth T.咬字有問題，但將問題轉移到聽眾身上，留言話「咬字唔清聽唔到你唱乜 已經唔係快定慢 係直頭唔聽廣東歌」、「自己條女俾人笑咬字不清想拉埋成個廣東歌樂壇落水」、「呢啲基本嘢 你連咬字都唔清 唸佛經咩」、「咁點解廣東歌著重咬字同歌詞唔可以係一種獨特性？」、「笑死 廣東話九聲 唔岩（啱）音已經唔係果個意思」、「湯生唱廣東歌真係幾難聽下，咬字音準都差要再教育下。」、「自己咬字有問題 唔檢討不突止 仲要話返d聽眾」、「不如專心做幕後好過啦」、「佢老幾 學人評論樂壇 自己唱到咁」、「咩叫行得慢 廣東歌就係廣東歌 同歐美 k pop本身就係兩樣嘢 佢所講嘅「行得前」根本就係講緊覺得自己啲音樂最好 「行得最前」 啲人唔鍾意就係佢哋有問題」及「中意咪自己作啲非主流中意嘅歌囉 好聽自然有市場 要聽眾改變口味去迎合你係咩道理？」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！