IT狗｜陳漢娜Hanna出道即獲提名金像獎 曾試過零工作花光積蓄情緒爆煲？

ViuTV原創劇《IT狗》成近期熱話，劇中演員備受關注，尤其係飾演電腦程式員蒙玲並與主角葉念信（凌文龍）有感情線嘅陳漢娜（Hanna）被網民大讚好演技，早前陳漢娜亦因出演Anson Lo（盧瀚霆）《不可愛教主》MV女主角而引發討論；但原來5年前陳漢娜甫出道已與古天樂合作，並獲提名金像獎「最佳新演員」，空靈氣質更被封女神。

28歲嘅陳漢娜大學時期已擔任模特兒，未有諗過要做演員；惟畢業旅行期間有幸參與《殺破狼·貪狼》試鏡而得到「李詠芝」一角順理成章入行。陳漢娜於電影中與古天樂飾演父女，表現不但被古天樂大讚，更入圍香港電影金像獎「最佳新演員」。其後，陳漢娜獨自去日本東京體驗生活，不過並無想像中順利，每日只係去模特兒agency辦公室等工作，卻無得到任何工作機會，加上生活開支大，短短3個月已花盡6位數積蓄，令佢情緒一度陷入低落狀態。

返香港後，陳漢娜獲唔少電影拍攝機會，更令佢愛上演戲，認為演員好似經歷唔同角色嘅人生，更係講故事嘅媒介，就如過往《G殺》師生戀、《遺愛》未婚媽媽以及《墮落花》she she戀呢啲經歷都與佢現實中截然不同；陳漢娜坦言每次拍戲都能喺唔同演員與導演身上學習，尤其係拍攝《墮落花》時與溫碧霞演繹情慾戲期間感受到對方份專業精神，希望日後有機會挑戰唔同角色。不過，陳漢娜認為演員被動，永遠都係等人哋選擇，加上疫情關係電影行業受影響，收入大減，幸得以前日本嗰段低潮期，令佢呢次識得應對，例如生活上盡量節儉，放物品上網賣等等，又指現時僅抱可以繼續做就繼續嘅心態，藉呢段時期嘗試創作，目標將來能成為幕後導演，自己寫故事。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！