Lokman、Frankie@MIRROR選「MIRROR毒舌王」 爆《冰上火花》趣事：味道最青春

楊樂文（Lokman@MIRROR）、陳瑞輝（Frankie@MIRROR）連同陳漢娜（Hanna）今日一齊出席活動，佢哋喺受訪期間就一齊評選MIRROR「毒舌王」三甲，並透露即將閉關綵排演唱會，更加預告演唱會分享；而Lokman亦都分享拍攝《冰上火花》嘅「青春趣事」，爆出拍攝期間充滿「青青嘅味道」。

熱播中嘅劇集《冰上火花》由Lokman、AK、Ian@MIRROR等主演，講述冰球場上嘅故事。劇中AK同Lokman嘅角色性格同現身中相反，劇中Lokman角色比較衝動，而AK就比較冷靜，Lokman就覺得幾搞笑幾多新鮮感：「突然間有啲衝突咁幾好呀！」Lokman亦都搞笑分享拍攝期間充滿「青春味道」：「啲Gear都著咗10幾個鐘，因為我哋太多人啦，唔夠地方擺出嚟曬，所以個味道太青春，總之就集合埋一齊，大兜亂。」雖然Gear每日都有消毒，不過Lokman就為免令濕疹更嚴重，就再帶膠手套先再著冰球手套：「我寧願焗啲，因為質地、味道，我都唔太能接受。」

至於早前出演完音樂劇《大象的告別式》嘅Frankie就話想試吓再試吓拍劇，睇吓可以將幾多音樂劇嘅感覺用返喺拍劇。佢哋亦都透露劇集《IT狗2》劇本已經寫緊，有機會下年開拍，將會係延續嘅故事。Frankie表示想挑戰反轉嘅人物性格：「如果Never變咗個性格都幾好笑，係嬲爆爆咁都幾得意，或者好似Lokman《冰上》咁串串貢。」另外，Frankie亦都希望可以出Solo，有唔同嘅曲風構思，更加公開向隊友陳卓賢Ian邀歌，相信對方好清楚自己，亦指邀歌成功率好高：「都高架，希望俾吓面啦」。

提到早前MIRROR開Live，隊友邱傲然Tiger當日特別毒舌，Lokman就話佢哋團內平時相處都係咁，可能當日Tiger唔夠瞓所以特別勁。講到隊內「毒舌三甲」，Lokman就自認一定係三甲之一，而佢亦都睇好「精準型毒舌」嘅Tiger：「Tiger就好精準嘅，佢哋拳一出就重㗎啦」，Frankie就表示：「AK係『效果型毒舌』，唔怕貨唔夠，睇你接唔接到嘅姐；Alton有時都好多金句，有時又未必係毒舌，用個道理壓贏你，『王道型毒舌』。」Lokman亦都補充指Frankie係「昇華型毒舌」，Frankie亦都自嘲：「要諗2個Level先諗到，我自己都未必明啊有時。」