NewJeans開直播向HYBE要求閔熙珍復職 一文睇晒紛爭來龍去脈（2024年9月版）

韓國女團NewJeans尋日突然開直播，向所屬母公司HYBE表達不滿及提出訴求，引起韓國以至全球KPOP fans嘅熱烈討論。

今年4月，人稱「NewJeans之母」、HYBE屬下娛樂公司ADOR高層閔熙珍，被爆有意策動叛變令ADOR脫離母公司HYBE，而HYBE亦指閔熙珍瀆職而要求閔辭職。閔熙珍舉行記者會，瘋狂爆粗兼瘋狂爆料，反指HYBE對佢作出打壓。以下係「NewJeans之亂」小筆記 －

• 閔熙珍2002年喺韓國藝能界巨企SM娛樂擔任平面設計師，後來晉升為創意總監，少女時代、SHINee、f(x)、EXO等偶像團體嘅的視覺及創作方針都係由閔熙珍打造。閔熙珍2019年裸辭離開SM。

• 捧紅BTS嘅娛樂公司HYBE， 2019年邀請閔熙珍加盟，為旗下子公司ADOR出任CEO。

• 閔熙珍為ADOR打造新女團NewJeans，但閔表示HYBE另一子公司同時準備推出另一女團LE SSERAFIM，並要求NewJeans「讓路」俾LE SSERAFIM先出道。結果兩隊女團先後喺2022年出道，7月出道嘅NewJeans一炮而紅，閔熙珍被封為「NewJeans之母」。

• 一直有傳閔熙珍不滿NewJeans走紅但自己未獲公司相應回報，近期更爆出閔熙珍有意將ADOR從HYBE獨立出嚟。HYBE先發制人，派企業監察組到ADOR高層辦公室調查，並指控閔熙珍同另一位由HYBE跳槽到ADOR嘅高層，洩露HYBE嘅公司機密，務求令ADOR大股東HYBE出售股份。HYBE因此要求閔熙珍辭職，更向內部員工發電郵直指閔熙珍有意奪權。

• 閔熙珍作出嘅反擊包括發文批評HYBE另一女團ILLIT抄襲NewJeans，有報導更指NewJeans有成員父母不滿ILLIT抄襲，但網友指責有人將偶像家人捲入內鬥。另一宗傳聞係指閔熙珍搵巫師作法令HYBE旗下天團BTS去服兵役，而閔熙珍又真係承認有搵過巫師，但強調搵對方因為大家係朋友！

• 閔熙珍4月召開記者會，表現令人側目，除咗以cap帽鬆身衫造型示人外，又一度情緒崩潰。閔熙珍話NewJeans為呢件事喊，又澄清自己唔係要奪權，而係要保護NewJeans，並踢爆「BTS之父」房時爀曾經要求以NewJeans「踩爛aespa」。閔熙珍有意令ADOR獨立，甚至帶埋NewJeans過檔嘅消息傳出後，HYBE股價試過單日唔見近7.8％。

• 閔熙珍同HYBE最終對簿公堂，結果5月時法庭判閔熙珍勝訴，閔熙珍更表明向HYBE提出和解。但係HYBE喺8月尾解除閔熙珍ADOR CEO職務，只負責做NewJeans製作人。NewJeans成員都有就此發文，字裡行間都難掩對閔熙珍被炒一事難以理解，令fans更擔心NewJeans未來。

• 執導NewJeans多個MV嘅導演申宇碩，ADOR要求佢刪除多條MV及相關影片。而另一以fans視角片段為主嘅youtube頻道都被下架。

• NewJeans尋日嘅直播一開頭就表明因為同營運團隊無法達成共識，於是進行直播，而公司並不知情。直播中，NewJeans表示同閔熙珍互相信任，而出道後曾經試過有私人片段及對話內容被公開，但HYBE未有理會。

• NewJeans成員Hanni喺直播中透露，喺公司化妝室遇見同門其他團體，佢向對方打招呼但被無視，對方經理人甚至話「唔駛理佢(Hanni)」。NewJeans曾經向ADOR新主管反映但最終不了了之。

• 直播入面，NewJeans向所屬母公司HYBE提出訴求，希望HYBE老闆房時赫喺今個月25號之前令ADOR回復原貌，包括將閔熙珍復職，並照舊將製作管理合併。最後，Hanni更以英文表明NewJeans日後唔會盲目服從HYBE嘅指示，佢地亦應該得到更好嘅待遇。

• NewJeans為今次直播特別開個新youtube帳號，但之後片段已被刪除。Fans對於NewJeans勇敢發聲反應不一，有人讚佢地夠勇氣，亦有意見認為咁做太唔理智，恐怕會影響佢地日後發展。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！