Pink Dot｜踏入十周年冀軟實力爭平權 9.22西九辦粉紅派對 93歲黃夏蕙任粉紅大使｜Yahoo

【Yahoo 新聞報道】性小眾嘉年華「一點粉紅」（Pink Dot）將於本月22日舉行，與往年一樣在西九文化藝術公園舉辦粉紅派對，活動費用全免。今年為活動十周年，逾20個演出單位坐陣，大會預料逾萬人次參與。93歲黃夏蕙首次擔任「粉紅大使」，對於明年政府需按終審法院指示落實同性伴侶關係替代框架，她相當興奮，「我而家就係等緊呢樣嘢啫」，又慨嘆本港同志平權步伐緩慢，「遲鈍到離晒譜」。

Pink Dot 十周年以「粉紅十年 We Are Fabu10us」為主題，逾20個演出單位包括周殷廷（YT）、藍奕邦、小肥、ANSONBEAN、張天穎、力臻等。今年商界支持是歷年最踴躍，贊助商多達35個。場內將逾80個攤位包括遊戲、講座等，亦邀得30家社區組織參與，向大眾講解性小眾的不同光譜，打破歧視。

夏蕙姨首任粉紅大使：人生係自由嘅，無嘢可以control

本屆Pink Dot有3位「粉紅大使」，當中包括93歲的黃夏蕙，記者會當中以一條粉紅花花裙造型亮相。夏蕙姨笑言，以往每年都有出席Pink Dot，希望今年一同宣揚愛。提到明年政府需落實同性伴侶框架時，她非常興奮，「好開心，我而家就係等緊呢樣嘢啫，人生係自由嘅，無嘢可以control（控制），尤其是係愛，咁你咪畀返個合法婚姻人哋囉！做咩要阻攔人啫？」早年移居外地的她指，外國多地早已有同性婚姻，香港步伐緩慢，「直頭係遲鈍到離晒譜！」

藍奕邦：同婚旨在給伴侶保障

另一粉紅大使由歌手藍奕邦擔任。他指香港的同志平權之路比其他地方落後，「所有民智開咗嘅人都可以做多少少嘢，我覺得所有嘅大進步都係嚟自每滴小小嘅進步」。談到同性婚姻在望，他坦言目前難以估計框架內容，「最緊要法律上對同性伴侶嘅保障，同男女婚姻可以近乎一樣，其實同性婚姻最終都係想畀伴侶一個保障」。

周殷廷（YT）亦是「粉紅大使」之一，「我覺得我嘅mission（任務）就係being there（存在），有時最簡單存在、出席就好足夠」。被問到對同性婚姻看法，「diversity（多元）係緊要，大家可以有個安全、安心嘅地方去愛，無話會唔會太遲，最緊要係向緊個啱嘅方向進發」。

大會料逾萬人次入場：track record都係和平

「一點粉紅」大會代表梁兆輝指，預計今年活動參與人數約1萬多人次，與往年相若。去年Pink Dot與區議會選舉撞期，入場人士需安檢，亦有較多警力維持秩序，他希望今年安排不再如此嚴格，「上年有咁嘅安排我係理解，我哋過往嘅track record（往績）其實都係和平嘅，希望佢哋（警方）會對我哋有信心」。

平權軟實力 與遊行互補

Pink Dot於2014年由梁兆輝從新加坡引入落戶香港，踏入活動十周年，梁指感覺很不真實，當年引入時希望Pink Dot與同志遊行互補不足，為同志平權鋪路，「用一隻比較軟實力，以文化出發嘅方法來改變民智和民思」。十年過去，同志遊行復辦遙遙無期。梁指新加坡在「377條例」（禁止男性之間發生同性性行為）下，不能以同志名義舉辦任何活動，因此才有Pink Dot的出現，也不要低估這種軟實力，如今新加坡377條例已廢除，「十年之後，突然間我哋香港無咗同志遊行，就係點解當年新加坡用呢個手法去做一個咁樣嘅事」。

終審法院去年頒令，政府需最遲明年10月確立同性伴侶關係替代框架，讓同性伴侶關係獲法律承認。梁坦言，裁決未指明「替代框架」內容，「所以我有少少擔心，覺得政府未必會交出一個合格嘅framework（框架）」，希望最終框架讓同性伴侶與異性戀婚姻享有接近甚至同等權利。對於社群正討論同志婚姻與民事結合制度，梁認為兩者皆可，「外國好多有同志婚姻前，都係有民事結合先，讓外間覺得習慣咗，慢慢再推會易啲，我兩樣都歡迎，唔係其中一樣可以取代另一樣嘢」。