TVB藝員祝文君肺癌離世 終年55歲 《食神》演主持家傳戶曉

曾為TVB多個節目擔任主持同演出劇集嘅祝文君，因為肺癌喺寓所離世，終年55歲，其好友麥德羅證實消息，TVB娛樂新聞台亦透過Facebook發布消息。消息指祝文君星期二晚喺睡夢中離世，家人一直陪在側，又囑咐好友轉告噩耗。

祝文君80年代初加入邵氏藝員訓練班，當時任職銀行職員嘅佢未加入娛樂圈，到1989年參加《歡樂今宵》嘅《周璇名曲大賽》，獲獎之後決定報考第3期TVB藝員進修班。祝文君畢業後先後擔任《K－100》、《娛樂新聞眼》、《城市追擊》等節目主持而為人認識，當年佢做《城市追擊》外景主持形象深入民心，連周星馳電影《食神》亦邀請佢客串飾演主持。

《城市追擊》結束後，祝文君移民加拿大，後來回流並主要參演劇集，多數演師奶。最近播出嘅《星空下的仁醫》、《十月初五的月光》以及《鐵拳英雄》當中，都見到佢演出嘅身影。而拍咗未出街嘅遺作有《童時愛上你》及周嘉洛主演嘅《痞子殿下》。去年《愛．回家之開心速遞》其中一集祝文君飾演根叔（劉丹飾）亡妻，只以背影及聲音現身，但已令觀眾感動不已。

祝文君係TVB藝訓班畢業生組成嘅「藝進同學會」永遠名譽會長。2019年祝文君接受高人意見，開始改用藝名王晴，豈料突然傳出不敵癌魔離世消息。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！