Tyson Yoshi自爆被認錯係MC張天賦 搞笑反應獲網民大讚性格好

過往有唔少藝人都試過喺街被「點錯相」而鬧出笑話，最近Tyson Yoshi就喺社交平台Threads自爆被Uber司機認錯係MC張天賦，場面既搞笑又尷尬。去到前日（16日），Tyson Yoshi及MC咁啱同場出席活動，佢哋就拎返起呢件事講笑。

最近Tyson Yoshi喺Threads出PO自爆被Uber司機認錯係MC張天賦：「一上車個司機就勁興奮，一路同我講，佢有個女仔朋友好鍾意我，成日同我啲poster影相。如是者相同對話一路講咗兩三分鐘左右，然後我都一路”多謝多謝多謝支持”可以影相呀！冇問題呀！然後突然間佢爆一句”X！我真係發夢都估唔到我可以車到張天賦!!” 哇X尷尬到極點，然後我同佢講我唔係MC啊，雖然都有人話我同佢似樣。」除咗Gareth.T及Edan@MIRROR分別留言：「唱幾句記憶棉嚟聽吓」及「我前排拍MV都俾人認咗做洪嘉豪」，一班網民亦有踴躍回應，例如「忍唔住 笑咗」、「可能你同佢講你係Tyson Yoshi佢仲興奮呢」、「身材差好遠」及「Hi MC」等等。另外，亦有網民大讚Tyson Yoshi性格好好，留言話：「我好鍾意玩Threads，因為呢度個Tyson好Funny」、「Tyson yoshi咁nice」、「佢d歌唔係我杯茶 不過個樣咁惡但性格X下X下好得人鐘意」及「Tyson不嬲nice」等等。

去到前日（16日），Tyson Yoshi及MC咁啱同場出席活動，佢哋唔單止冇尷尬，仲拎返件事嚟講笑，MC影住Tyson Yoshi並寫上「係張天賦OMG」，Tyson Yoshi發現被影後就即刻瞪大眼晴並疑似向鏡頭爆粗，非常搞笑。之後，Tyson Yoshi亦冇放過機會，趁MC到化妝間整頭髮時作出反擊，闖入其化妝間並話：「嘩！呢個咪Tyson，可唔可以同你影張相呀？」，而MC就回應話：「張天賦？肥咗喎」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！