Yahoo娛樂圈｜蘇韻姿 專訪 「踩過界」重拾夢想挑戰音樂工作 用行動反擊傳言：唔洗為討好別人改變自己

提起蘇韻姿Andrea，相信大家首先會想起的必定是無綫處境劇《愛．回家之開心速遞》「紅衫魚」熊心如一角，畢竟一拍就六年，由選港姐加入無綫後到離巢前兩年，Andrea由23歲拍到29歲，笑言：「我好愛熊心如，成個二字頭俾咗佢！」離巢數月，Andrea「百足咁多爪」， 由親身出演舞台劇、教小朋友音樂劇唱歌，再到最新加入《Yahoo Lunch K》挑戰主持及唱歌工作，突破自己之餘，繼續「貪心」的性格，再次拾回當初的音樂夢。

參加歌唱比賽入行 回比16歲的蘇韻姿：想感受觀眾的力量

最近《港姐2024》選美開始，不少佳麗都會指「夢想成為港姐」或「想透過選美入行」，不過Andrea就直言自己並沒有選美夢。赴港參選前曾參加歌唱比賽太第二名的她當時更希望以歌手出道：「其實我心裏面對住16歲蘇韻姿係想（出歌做歌手）嘅，好細個嘅時候我真係好想做歌手，因為我好鍾意舞台上面Live表演呢樣嘢，因為你喺舞台上面感受到觀眾嘅力量同你拍嘢好唔同。」不過後來誤打誤撞來港選美，更有幸獲得賞識加入劇組，連續6年出演《愛・回家》「熊心如」一角，更憑角色成功入屋。

獨自來港面對經濟問題 藝人風光背後亦要捱：條路自己揀

藝人往往給人一個光鮮亮麗，家庭富有不愁吃喝的印象，不過風光背後實際都不乏一班為夢想拼搏的演藝人員。參選港姐當刻起，Andrea就毅然獨自回港打拼，更直言疫情期間面臨經濟困難：「因為真係冇晒Job，雖則大家以為拍《愛・回家》『爆Show』就會好多錢，但係並不是大家諗嘅意思嚟，係一個公司計人工嘅方法嚟，爆極都唔會話爆得好緊要，本身做藝員，特別我呢啲位置嘅演員唔會話係好高嘅人工，好基本嘅，所以好多時基本嘅Expense（開支）都未必Cover到；不過喺公司裏面你已經算係有最穩定嘅人工（拍攝《愛・回家》），你冇資格呻你唔夠錢洗，因為條路自己揀，你自己揀Stay喺香港嘅。」

Andrea亦都直言一直質疑自己堅持，更加一度有打算放棄：「我好鍾意做呢一行，我好鍾意表演，我好鍾意唱歌跳舞演戲，我好想堅持，但係連Basic（基本）嘅嘢搞唔搞得掂呢？你冇地方住你就咩都做唔到啊！如果你連基本都搞唔掂，其實就會變咗你冇資格追夢。所以一路都會諗呢啲，會質疑自己究竟我嘅堅持我肯捱都唔代表我會做到。」為夢想甘願捱窮，為生活Andrea透露當時邊拍劇邊「秘撈」，化身「Miss Hung」為小朋友補習、教唱歌賺外快，令夢想同現實並存：「為你想做嘅嘢堅持永遠都係值得嘅。」

傳被無綫「雪藏」用行動反擊：唔洗為討好別人改變自己

加入無綫8年，Andrea亦都曾被傳遭「雪藏」：「愈傳愈俾人標籤咗我係咁，嗰陣有啲唔開心。我一路以嚟好努力Build up（建立）一個好正面嘅形象，一路都好用心工作，做好我自己，點心我個Reputation（聲譽）會被人寫到咁嘅呢，變咗會唔會有啲人睇咗咁耐啲報道而對我嘅印象有影響，呢啲位係我最唔開心嘅嘢。我有唔開心過，不過我亦都覺得冇㗎，你咪唯有用行動證明俾大家睇並不是這樣的，慢慢啲人就會見到。」Andrea透露工作多年亦曾遇到「壞人」：「點都會有嘅，每個地方都會有好同唔好嘅人，咁你見到一啲你唔認同嘅行為你唔一定要Join in嘅，你做返你覺得啱嘅事情係可以㗎，唔洗為咗討好別人，或者令大家覺得你係Part of佢哋而去改變自己。因為做人最緊要要有自己啊，你唔可以冇咗自己啊！」

遇到「壞人」之餘，Andrea都感受到不少暖意：「有個駐場打燈師叫『雄爺』，我成日好容易聲沙，一Cut機佢就會『阿妹，你又聲沙啦喎，記得飲多啲水啊』一啲好簡單嘅小關心係好窩心㗎！我走嘅時候都有影相擁抱，佢都有講話真係『當我女咁』，呢句真係好窩心！無論台前幕後，大於一啲監察高層，細於PA或者特約，其實我感受到唔同層面嘅愛，我係永遠都會記得每一個對我好嘅人！」

無任歡迎「回家」演出 透露有意進軍歌手界

離巢數月，Andrea作出不少新嘗試。除了會繼續於《Yahoo Lunch K》擔任主持，更透露有音樂界人士曾接觸討論合作，Andrea亦表示會繼續鍛鍊自己加強實力往歌手路進發。至於被問到日後會否有機會「回家」，就表示無任歡迎：「我哋唔係反面中止合作關係，呢個係我母校嚟㗎，我永遠都會感恩佢俾咗我嘅嘢，佢令我學到嘅嘢，唔係嘅話我而家都未必講到中文添。」