全民造星4｜中性Dru爆冷贏仙氣Yoyo躋身60強 方方比上季成績更差？

ViuTV《全民造星IV》噚晚（11日）最新一集，繼續係99強爭入60強；共有3組參賽者進行比賽，分別係Dru對戰Yoyo、2Ling對戰榛綦，以及方方對戰Marf。黃慧君（花姐）對參賽者有讚有彈，就好似當Dru完成綵排後，花姐表示好想摑佢一巴，而睇完Yoyo表演就話「寧願唔要MIRROR都要佢」，肯定Yoyo嘅實力。

第一組：Dru對戰Yoyo，賽果爆冷？
Dru與Yoyo為第一組對戰嘅人選，Dru一身中性打扮示人，Yoyo就以仙氣純白服裝表演，外型風格上大不同，Dru以《刻在你心底的名字》作為參賽歌，不過就畀評判朱栢康話佢嘅歌聲未能感動到佢；而Yoyo就跳唱高難度歌曲《Lydia》，雖然評判一致大讚，導師梁祖堯都指Yoyo嘅演出係一場專業表演，不過評判卻投晒票畀Dru，Dru進入60強並歸納入梁祖堯組別，而Yoyo就跌入復活區。

第二組：2Ling對戰榛綦，花姐直言唔想畀2Ling入60強？
舞蹈員2Ling以歌曲《未知》參賽，但似乎花姐就唔係好滿意佢嘅表演，認為佢好造作，直指：「俾佢入，我會即刻喺呢度發脾氣」；又喺後台模仿2Ling舞姿。至於有「家燕媽媽最後希望」之稱嘅榛綦就跳唱歌曲《Ain't My Fault》，評判大讚身上喺佢身上搵到鄭融影子，導師許廷鏗就表示：「喺家燕媽媽學院嚟講，佢算好突出。」結果由榛綦勝出，係繼莎莎後，第二位「家燕學徒」成功躋身60強，而2Ling就跌入復活區。

第三組：方方對戰Marf，方方比上季成績更差？
曾喺《全民造星III》晉身20強嘅方方以團隊唱跳《Mulan》應戰，雖然被梁祖堯大讚佢唱功有進步，但朱柏康就表示：「你Sell你個Team係成功嘅，但係你自己嘅話，就遜色咗少少。」至於「翻版炎明熹」Marf就以一段喜感舞蹈演繹《Pass That Dutch》，帶動現場氣氛升向高潮，最後獲評判團一致讚賞，晉級60強並進入許廷鏗隊伍，至於跌入復活區嘅方方就忍唔住落淚，要跳舞隊友安慰。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！