富貴KOL雪姨開箱CHANEL聖誕倒數月曆 愈拆愈激動：6千幾蚊買紙盒

YouTuber兼KOL雪姨（容可兒、Sharon）投資有道，除咗購入北角寶馬山花園及北角半山豪宅單位，仲坐擁8間公司，自言做生意未試過失敗。不過，前晚（15日）雪姨就喺Instagram開Live同觀眾一齊開箱CHANEL聖誕倒數月曆，雪姨一邊拆一邊感到崩潰，仲話：「我投資從來無失手，呢鋪輸獲甘」。

呢次係CHANEL首度推出聖誕倒數月曆，以巨型 N°5 香水瓶身作靈感，售HK$6,250，雖然價錢唔親民但仍然「一曆難求」，雪姨大讚倒數月曆外型，特意託相熟朋友購買，諗住將每格嘅禮物抽獎送畀觀眾，之後雪姨逐一拆開每格禮物，第一份拆到嘅係一支貨size唇膏，直言：「ok喎有誠意喎。」；第二份就拆到CHANEL水晶球吊飾，不過後嚟就拆到好多格都係書簽、貼紙、手繩、電話繩同磁石，令佢愈拆愈懷疑人生：「你畀啲良心，我畀6千幾蚊，你覺得我呢個年紀鍾意玩貼紙？入面點解唔係啲sample，呢盒嘢真係攞晒命，唔係講笑。」

雪姨表示自己用6千幾蚊買咗一個白色紙盒同一堆貼紙返嚟，直言：「邊個會想要CHANEL貼紙啊？」雪姨仲好激動咁爆埋粗：「唔知今晚究竟經歷咗啲咩Fxxk！」，又指feel唔到呢盒月曆點樣值6千幾蚊，如果用同樣價錢已經可以買到好多貨size做禮物。一班網民表示自己由頭笑到落尾，仲話多謝雪姨令佢可以慳返唔使買：「個盒已經係價值6000幾，入邊嘅係贈品」、「文具套裝開箱，笑死」、「人地D calendar 越拆越開心，呢個調翻轉，越拆越唔開心，真係覺得Chanel係度玩D鍾意佢鍾意到會用六千幾買佢個calendar嘅人，少過份」、「雖然中伏，但係好搞笑」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！