雅虎香港新聞 《明日戰記》《阿媽有咗第二個》票房先後破3千萬 港產片下半年翻身有望
暑假完結，今年夏天嘅香港電影市道可謂出現大逆轉，3套港產片都收超過3千萬。全城為古天樂打氣嘅《明日戰記》，上映一星期票房已經衝破3千萬，下一個目標應該係今年港產片票房冠軍，以及邁向歷來港產片票房十大。電影官方fb亦post出多位國際級視覺特技大師讚賞《明日戰記》嘅短片，包括曾以《天煞地球反擊戰》奪得奧斯卡最佳視覺效果的 Douglas Smith 、《未來戰士續集》及《侏羅紀公園》的視覺特效師 Mark Dippe同埋有「高達之父」之稱的日本機甲設計師大河原邦男。
同樣喺8月上映、由毛舜筠、姜濤及柳應廷(Jer）主演嘅《阿媽有咗第二個》，亦都宣布票房超過3千萬。由於MIRROR演唱會事故，姜濤及柳應廷未能現身謝票，導演彭秀慧及女主角毛姐馬不停蹄走勻全港。
至於由MIRROR成員呂爵安同吳君如、梁詠琪及鄭中基主演嘅《闔家辣》，上畫個半月仲未落畫，日前吳君如拉隊謝票時宣布票房已超過3288萬。
今年初新冠疫情大爆發，政府制訂嘅防疫措施之下，戲院上半年長時間停業。根據香港票房有限公司公布香港上半年電影票房數字，今年上半年只有6套港產片上映，票房收入頭5位嘅港片，全部唔過100萬。去到下半年，前面提過嘅三套港產片衝破3千萬之外，小本經營嘅《緣路山旯旮》都收過6百萬。原定今年賀歲檔嘅《飯戲攻心》將於中秋假期上陣，日前優先場開售買個滿堂紅，加上有票房保證嘅黃子華，極有可能成為今年第4套3千萬票房港片。另外由林海峰、蘇玉華主演嘅《正義迴廊》，以及梁朝偉、郭富城主演嘅《風再起時》都會陸續出場，今年香港電影有望一洗頹風！
是日精選
好聲好戲2丨袁偉豪為丁蟹配音甩嘴失誤 斥節目配樂過大聲影響現場氣氛：唔通配樂先係主菜？
《明日戰記》《阿媽有咗第二個》票房先後破3千萬 港產片下半年翻身有望
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
