《消失的她》原型王暖暖官宣產子 網民留言送祝福

內地懸疑電影《消失的她》由文詠珊（Janice Man）、朱一龍、倪妮主演，票房突破35億港元，令Janice Man成為「億萬票房女星」，成功撇甩當年「𡃁模」形象，演技受到肯定。電影係真人真事改編，故事取材自2019年一名中國孕婦王暖暖，因老公俞曉東覬覦佢嘅千萬家財，所以喺遊泰國曼谷國家公園時，竟然狠心將佢推落34米高嘅懸崖，王暖暖雖然奇跡生還，不過全身有17處骨折，縫了200針，懷有5個半月嘅腹中胎兒亦因藥物影響而流產，最終行兇嘅老公被判監33年零4個月，而現時離婚官司正在訴訟。

喺前日，電影嘅原型王暖暖（化名）喺微博宣佈喜訊：「給大家報喜了：終於盼來了我的皮夾克，母子平安！2102日夜，終於再次擁抱了奇蹟！我聽到了這個世界上最動聽的聲音！當看到他稚嫩小臉的那一刻，過去五年來所有艱辛，全都消散了！還好我沒放棄，沒放棄自己，也沒放棄你，愛迎萬難，愛也贏萬難…謝謝你親愛的寶貝，來到我的世界！今年的中秋，你讓媽媽迎來了圓滿！媽媽也想對你說這個世界很美，餘生媽媽陪你一起踏閱！」

呢個PO一出，唔少網民紛紛留言送上祝福，例如「恭喜姐姐 月圓人圓團圓！」、「恭喜恭喜，好勇敢的你，改變人生軌跡了」、「太棒啦！失去的一切都慢慢在回來」、「你真的很勇敢，祝福你和寶寶，平安喜樂，順遂無憂，生活明朗」、「你真了不起呀！好好休息呀，祝寶寶健康快樂成長～」、「真為暖暖感到開心，希望小天使永遠幸福！」、「你真了不起，你值得幸福，祝福」及「祝福你！ 再一次的重生，好好活著去享受這個世界！」等等。

王暖暖曾被判定不孕不育，所以佢喺接受傳媒訪問時就話知道自己懷孕後開心驚喜感動，但佢嘅髖關節承受能力有限等因素，導致佢嘅懷孕過程比一般正常孕婦痛苦，所以BB出世嗰一刻，佢即刻感覺到踏實。另外，佢仲話BB未改名，希望網民可以幫佢一齊改名。

唔少網民都好好奇爸爸嘅身份，而佢就曾經喺社交網站回覆「試管」二字，而佢亦唔打算公開爸爸身份，只係希望BB可以健康及快樂地成長。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！