無綫下周一變陣 黃金時段只播一套劇集 靠改播綜藝節目搶回收視？

近月TVB同ViuTV電視大戰愈演愈激烈，自從曾志偉同王祖藍回巢救亡後，無綫推出多個綜藝節目及電視劇與ViuTV對撼，好似最新就有《刑偵日記》VS.《大叔的愛》，雖然前者收視較高，但後者就贏盡口碑兼喺網絡上瘋狂洗版，更成為大家茶餘飯後熱門討論話題。有傳因電視大戰及迎接東京奧運會嘅關係，無綫喺下星期一（19日）開始變陣，由以往喺黃金檔期播兩套劇集，變成只播一套劇集，改播綜藝節目。

無綫喺下星期一進行大變陣，首先將星期一至五嘅《東張西望》及`《愛·回家之開心速遞》提前半小時播出，而8點半檔期就會改播綜藝節目，即係《寶寶大過天》播映完畢後，無綫並冇安排新劇接捧，而係計劃播出1個半小時嘅綜藝節目，將會播映《聲夢傳奇决賽》、《明星運動會》、《盛．舞者》以及《全城迎奧運》，直至下月9日先至會有新劇出街。至於9點半檔期方面，正在播映嘅《刑偵日記》亦會順延至10:15播出。

《刑偵日記》搵嚟兩屆視帝王浩信、惠英红、姜皓文、袁偉豪及黄智雯等好戲之人演出，劇情更圍繞唔同嘅心理及精神病患者，劇集題材大膽又創新，但可能較為難明同燒腦，令劇集播映至今反應麻麻，首5集嘅收視更只係得17.5點。雖然收視咁低，不過王浩信喺出席活動時就話而家觀眾會喺唔同渠道睇劇，所以淨係睇傳統收視並不恰當，再加上劇集喺微博多次上過熱搜榜，咁樣就證明成績唔太差，收視率唔可以代表一套劇集嘅質素。相反，由MIRROR成員Edan（呂爵安）、Anson Lo（盧瀚霆）及黃德斌主演嘅ViuTV劇集《大叔的愛》，劇情輕鬆又搞笑，觀眾好評如潮，首5集收視錄得6.4點，較早一星期播出嘅《造美人》上升咗一倍收視，更成為成為ViuTV開台以來最高收視嘅劇集。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！