【2021聖誕】美食多籮籮！4大聖誕市集逐個睇

嚟到11月中，街頭上嘅聖誕氣氛都逐漸濃厚，唔知大家準備好過聖誕未呢？想提早感受聖誕氣氛，行下聖誕市集都係唔錯嘅選擇，今年各區都繼續有唔少歐洲風嘅市集陪大家，除咗打卡仲有得玩又有得食，仲唔快啲bookmark！

糖廠街 白色聖誕市集

位於太古糖廠街嘅白色聖誕市集闊別兩年，今年終於回歸啦！今年市集將幻化成「聖誕奇幻工廠Santa’s Whimsical Factory」，喺太古坊糖廠街同一樓辦公樓大堂舉行。分別有聖誕購物同美食攤擋、互動打卡熱點、DIY工作坊同一系列嘅現場表演，美食攤檔仲特別邀請到香港東隅酒店、餐廳Enoteca以及糖廠街市集特定攤檔為大家精心炮製各款應節食品同埋飲品，齊齊準備迎接白色聖誕啦~

日期: 12月2至12月5日
地點: 鰂魚涌太古坊糖廠街及一樓辦公樓大堂

新城市廣場 布魯塞爾聖誕市集

想感受外國過聖誕嘅感覺，咁就唔可以錯過沙田呢個布魯塞爾聖誕市集～市集以比利時嘅甜品聖誕市集做主題， 以糖果色系作為設計主調，更有五大打卡位包括「玫瑰星球旋轉木馬」、「閃耀聖誕樹大道」、「雲間摩天輪」、「飄夢熱氣球」以及「戀戀玫瑰園」，啱晒各位女生！影完相又點可以唔食嘢補充下精力呢，美食攤位包括手作夾心牛角包窩夫Croffle、人氣bagel麵包店、來自日本大阪嘅得獎高級生吐司專門店同埋喺英國、日本嘅世界級柑橘果醬比賽中橫掃多項大獎嘅果醬店等，款款都好吸引，多到唔知點揀好！

日期: 11月5日至明年1月2日下午1時至晚上9時
地點: 沙田新城市廣場一期一樓羅馬圓型獻技場及三期三樓

Popcorn 歐陸風小鎮市集

酒鬼們必去Popcorn呢個市集，首先會喺商場地下舉行美酒滋味體驗遊，將會有兩間pop-up進駐包括行內知名品牌The Whisky Library，可以試到唔同風格嘅威士忌、朗姆酒、干邑、雅文邑同伏特加；另一間係法國手工洋酒PENTICTON，供應香檳及松露醬等聖誕禮品套裝，亦會提供免費鴨肝試食！另有多個世界知名及本地酒品牌，包括日本清酒專家SAKE CENTRAL，令大眾真正享受及認識日本酒文化；本地精釀啤酒廠Mak’s Beer，以香港原料釀製啤酒，加入local常用嘅特色食材如甘蔗、桂圓、香芧等材料釀酒。另外好有人氣嘅本地氈酒蒸餾廠 Two Moons Distillery亦會喺市集出售人氣熱賣產品「四季桔氈酒」，內有亞洲特有四季桔，口感清爽帶微微果香。

赤柱廣場 赤柱聖誕市集

每年都會吸引唔少人捧場嘅赤柱聖誕市集，集齊多款特色手工藝品、手作飾品同美食攤檔，今年市集再次回歸，以西部牛仔為主題，喺12月11日起一連兩個週末同聖誕期間舉行。到時有超過60個特色同人氣品牌攤檔，漢堡、咖啡、甜品、Gin酒等都有，最吸引係可以帶埋毛孩一齊去呀！

日期: 12月11-26日（逢星期六、日）、24－27日12時至晚上8時
地點: 赤柱廣場 (香港赤柱佳美道23號)

更多聖誕節慶餐飲、活動及折扣詳情：(按此)

文：Yanica