中年好聲音︱支嚳儀性感演繹《愛情陷阱》獲評判激讚 網民唔buy：好難頂

TVB歌唱真人騷《中年好聲音》好評如潮，前晚（26日）最新一集播出《譚校長金曲！爭入12強！》，搵嚟譚詠麟擔任嘉賓評判，15位參賽者輪流唱出校長金曲爭入12強。被譽為「顏值擔當」嘅支嚳儀（Venus）選擇唱出全新編曲嘅《愛情陷阱》，雖然表演獲得全晚最高嘅91分兼獲評判們高度評價，不過唔少網民似乎唔係好buy佢呢個既性感又迷幻嘅演繹，留言指表現作狀又難聽。

支嚳儀上集與涂家堯合唱《Endless Love》獲得85分，最新一集就單人匹馬唱出譚詠麟經典金曲《愛情陷阱》，呢個性感又迷幻嘅《愛情陷阱》，成功展現其唱歌實力和女人味，結果獲得全晚最高嘅91分，例如周國豐大讚佢音準及咬字改善咗好多，及譚詠麟大讚演出目不暇給等等。

當晚情緒激動嘅支嚳儀，事後有喺社交網站出PO，多謝TVB台前幕後工作人員、前輩和評審們嘅鼓勵、及老師韋綺姍嘅教導。雖然佢嘅表演獲得評判們嘅高度評價，不過唔少網民就唔係咁鍾意呢個表演，負評塞爆留言區，例如「表情作狀，唱歌作狀，講嘢作狀，動作又作狀 真係queen of the作狀，好難頂」、「唔係中年好聲音，係姣婆好聲音」、「唱得很難頂」、「作狀...完全冇感動位」、「這個是唱歌比賽，咁又發姣作狀做咩遮。」、「呢個女人咁作狀，簡直不知所謂！屢勸不聽。嘔血」、「我也不懂欣賞,不覺好聽!聽不出為何有91分!好牽強!」、「咁經典嘅快歌，改到如此，其實有點格格不入，為改而改」、「唔公平，有重新編曲，睇到d男人⋯⋯不如唱擋不住的風情」、「好難頂，姣到出汁」、「賣弄風情，唱功欠奉。」、「明顯偏袒，直接把冠軍頒給她好了！」、「老實講 唔好聽」及「我無法想像一個咁樣唱法女仔可以攞91分，我真係懷疑究竟呢班評判做緊啲乜嘢，今次評審令我大失所望？如果譚詠麟先生，你都認為這樣可以收貨？我都無話可說？」等等。

不過亦有部份網民認為佢表現不俗，留言話「導師教得好，佢又吸收得好。樣又靚！有齊聲，色，藝，贏硬！」、「玩得好喎 果然係佢最好表演 d音都準哂」、「簡直係超班馬!!!果然係當年北美洲新秀歌唱總冠軍」、「唱得好好別有風格」及「音樂編排應記一功，令人耳目一新，支嚳儀演出有突破。」、「有個人風格,又靚女,冠軍之選」及「支嚳儀這個演繹讓人驚艷！！！技驚四座！！！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！