中年好聲音｜屯門娜娜爆冷入圍 100強參賽者中皆藝人親屬或熟口熟面

TVB選秀節目《中年好聲音》由當年參加新秀奪冠入行嘅車婉婉主持，仲係由總經理曾志偉親自邀請；車婉婉就坦言有壓力，為與參賽者一齊成長，就用上一日半時間睇咗成200條海選片段。經過多輪面試，《中年好聲音》已選出100強，其中31位參賽者率先與4位評審肥媽（Maria Cordero）、唱片監製張佳添、周國豐及資深音樂製作人伍仲衡於昨日（3日）出席記者會。

31位參賽者中不乏熟悉嘅面孔或藝人親屬，包括「屯門娜娜」董幸兒、李玟家姐李思林、陳欣健女兒陳早怡、曹敏莉妹妹曹敏寶、黑妹李麗霞女兒葉穎秋、鄺文珣丈夫應德榮、JW王灝兒朋友支嚳儀、歌手何弘軒、周吉佩、曾參加《肥美人》真人騷嘅李泇霖及於《愛·回家之開心速遞》飾演「賈名媛」嘅邱芷微。屯門娜娜為其中一個爆冷人選，當初因跳大媽舞出名，繼而轉為網上直播主嘅佢坦言無諗過會入圍，收到通知時好開心，即與家人報喜；不過佢就話無殺手鐧，宜家只會聽多啲歌備戰，又希望可加入跳舞環節。

陳欣健女兒陳早怡就表示當初係陪兩個好朋友面試，並在最後一刻先通知爸爸參加咗比賽，結果成功入圍，仲指老公不但無投訴佢因練歌搞到無時間陪伴，仲陪自己練歌。而李玟家姐李思林就表示，因妹妹李玟最近較忙，未有告知參賽一事；亦指大家難免會將佢同妹妹比較，但認為二人聲線唔同，希望大家畀個機會佢咁話。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！