去「第二個家」吸金 廚神上身 陳展鵬帶老婆 部署馬國掃磚頭

陳展鵬於馬來西亞人氣甚高，他亦視當地為第二個家，日前他為當地雞煲店拍攝廣告，以型爆廚神造型示人。他更帶太太重遊當年拍劇的景點，坦言有意於當地置業呢！

視帝陳展鵬於馬來西亞擁有甚多粉絲，日前他應當地一間連鎖雞煲店之邀請擔任代言人拍攝廣告，以一身廚神Look上陣的他施展刀功、廚藝，有板有眼。他坦言很久沒跟太太單文柔（Phoebe）出外旅行過2人世界，適逢對方很多地方未去過，故他今次充當導遊帶老婆到處遊覽。

他受訪時說：「本身呢個廣告都傾咗成年，之前因為疫情一直都過唔到去，呢個係一個好嘅開始。馬來西亞真係自己第二個家，喺嗰邊好多得着，無論獎項或人氣都係。Phoebe好多地方都未去過，好似檳城、怡保、吉隆坡咁，我就帶佢感受當地人嘅熱情，今次全程都食咗好多嘢，都肥咗好多磅返嚟，所以大家見到啲相唔好以為佢大肚，佢已經好積極減肥做運動。」

展鵬亦帶Phoebe重遊當年拍攝劇集《單戀雙城》的景點，兩人更拍下照片留念，他說：「以前拍劇時嗰度好荒蕪，依家已經有好多新發展，本身我哋想玩耐啲，喺嗰邊睇樓，嗰邊呎價唔錯，環境又好，又多美食，我最鍾意係用膠袋裝嘅原汁原味白咖啡同貴刁，今次住嘅地方居然係有溫泉添！真係估唔到！不過因為要返嚟準備好多台慶嘅嘢，惟有下次有機會再去！」

爭視帝呼聲高

說到今屆視帝之爭，以他與陳山聰、林敏驄的呼聲最高，而今屆馬來西亞視帝，他亦是頂頭大熱，他說：「觀眾嘅投票係最公平嘅，驄哥個劇同佢嘅演出出嚟反應好直接，而山聰咁多年嘅努力、成績大家都有目共睹，我自己都會落力拉票嘅！」