傳李佳芯Ali主演新劇成告別作 IG罕有放負：用盡氣力的 徒然

女神級藝人李佳芯（Ali）入行多年，18年憑《BB來了》嘅港媽唐恬兒一角榮升視后，演技備受肯定兼深得網民愛戴。近年Ali疑似被內地封殺及遭TVB雪藏，直至早前先解凍，夥拍譚俊彥拍攝新劇《麻雀樂園》，但近日Ali喺IG上載一張金魚黑白照，再一次惹來離巢疑雲。

一向樂觀嘅李佳芯罕有放負喺IG上載一張金魚黑白照，並寫上：「用盡氣力的 徒然 . .」，Ali冇進一步解釋呢個PO嘅意思，令一眾網民及粉絲既好奇又擔心Ali嘅狀況。雖然Ali終於接拍劇集，不過一直有傳《麻雀樂園》係佢嘅告別作。

電視劇《麻雀樂園》喺上月中進行拜神儀式，女主角李佳芯就話監製形容佢嘅角色係一個女漢子，既溫柔又剛強，而佢同譚俊彥嘅角色係由細識到大，所以關係好close。咁佢哋二人角色嘅發展空間，Ali就大賣關子話好close但最後會唔會發展更加多，要等觀眾到時自己睇。近日一班演員已經進入劇本圍讀階段，Ali亦換上一頭清爽嘅髮型，同時Ali亦表示會飾演自己嘅17歲，令人充滿新鮮感及感到有初戀嘅感覺。

TVB扮嘢真人騷《福祿壽訓練學院》中，李思捷曾模仿Ali喺《智能愛人》中飾演嘅阿寶，更出言狂寸李佳芯：「啱啱先由個雪柜行出嚟，所以我覺得有啲凍」，又重演換衫被打格仔一幕，以影射李佳芯被內地平台打格仔一事。而Ali喺接受訪問時就話有聽聞，不過佢自己就冇睇，同埋「自己公司做返證明都幾開明呀，咁都幾得意嘅」。至於模仿換衫情節，Ali就話劇情上佢都有打格仔，李思捷只係食返呢樣。另外，佢仲話有一日唔知係咪拍攝，李思捷見到佢嗰陣時有口難言。而依家佢終於明白，原來玩緊一個咁樣嘅主題。另外，對於早前到職訓局分享後慘被P走，Ali亦大方表示回應：「嗰一次我就去一個戲劇上嘅分享，之後我都冇理咁多就繼續工作，每個部門都有自己處理方法，我自己就不去評論。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！