雅虎香港新聞 必食牽絲仙草冰+滑到瀡入口嫩仙草 台中夜市人氣仙草甜品店登陸中環
再有台灣甜品店開到香港！今次係嚟自台中逢甲夜市，主打嫩仙草嘅「八時神仙草」，店名源自將仙草熬煮八小時，充分釋出仙草本身嘅膠質。嫩仙草名副其實，滑到可以好似瀡滑梯咁瀡入喉嚨！另一必食係仙草雪花冰，用嫩仙草冰磚打成，潷起見到牽絲，食落好似棉花糖咁入口即化啊。
一切從台中巷仔小鋪開始
Megan一開始喺台中逢甲夜市開店，取名為神仙草，大家都知道逢甲夜市喺當地最出名嘅商圈，租金高昂，Megan一開始創業只能夠喺巷仔裡面最後一間嘅舖位開始。未有人潮嘅時候就出去舉廣告牌，慢慢靠客人嘅口碑，成功變成排隊名店之一。後來改名為而家嘅八時神仙草，以類似咖啡室嘅方式經營，希望有更舒適嘅環境。
問到點解會選擇主打仙草，Megan指係因為佢男朋友好鍾意食芋圓，需要其他食材嚟襯托芋圓，而佢哋喺澎湖食過一個好好食嘅仙草冰，覺得可以試下就開始研究。因為Megan同男朋友本身都唔係做餐飲出身，所以都係靠網上搵文獻同自己試，前前後後研發咗半年先得出而家嘅配方。
涼粉同仙草有咩唔同？
佢哋嘅嫩仙草尤其嫩滑嘅秘訣在於遵循古法，選用台灣同印尼嘅仙草乾，取前者嘅香氣同後者嘅膠質，一齊熬煮至少八個鐘，只需要加少量澱粉即可成形。咁台灣嘅仙草同香港常見嘅涼粉有咩唔同？Megan解釋其實兩種都係用仙草乾，但加入澱粉比例唔同，因此呈現出嚟嘅口感都唔一樣。
台灣坊間大部分仙草為咗快速製作，都會加入鹼粉或者魚膠粉幫助凝結，但咁樣會令仙草凍後韻有澀味或者口感變脆。而八時神仙草就堅持用天然材料、無鹼製作，沿用傳統做法以長時間熬煮釋出仙草膠質，入口係仙草本身嘅回甘，原汁原味。
材料除咗部分生鮮食材例如牛奶，其他100%都係嚟自台灣。不過Megan指有按香港人口味微調，例如台灣嘅奶茶會係奶香大於茶味，而考量到香港人鍾意茶味多啲，就有調整到奶茶嘅比例。Megan同臺中國家歌劇院概念店店長更特別嚟香港，用一個月時間培訓員工，希望盡量還原台灣店嘅風味同體驗。
熬煮八個鐘嘅天然嫩仙草
如果係第一次嚟八時神仙草嘅客人，Megan會推介試嫩仙草盛盤，有嫩仙草同五款配料。嫩仙草口感的確比一般食到嘅涼粉或者仙草凍都嚟得細嫩，滑到好似瀡滑梯咁立即瀡入喉嚨！咬落係仙草嘅微甜回甘，加唔同配料都夾。
配料有芋圓、地瓜圓、珍珠、紅豆、紫米。當中芋圓同地瓜圓都係自家製作，選用屏東或大甲芋頭同大肚山地瓜，比市售芋圓都更大粒，外滑內軟，咬開會食到芋頭或者地瓜嘅顆粒，甜度適中。手工芋泥非常綿密，芋頭味道天然。
仙草冰磚打成牽絲雪花冰
雪花冰用嫩仙草冰磚即打，比起台灣一般用清冰配仙草凍，或者用仙草茶雪凍打成碎冰唔同，呢度嘅雪花冰潷起會見到一絲絲嫩仙草，食落特別綿密，會好似棉花糖咁入口即化！食落啖啖都係心機，皆因熬煮仙草茶就要八個鐘，仙草凍成形亦需要八個鐘，最後將仙草凍雪成冰磚更需時24至48小時啊。
呢份抹茶燕世雪花盛盤上面係用加入蕎麥顆粒嘅奶蓋同日本抹茶雪糕，增加味道同口感層次，特別係抹茶雪糕嘅茶香同仙草嘅回甘好夾。配料同樣係有齊芋圓、地瓜圓、珍珠、紅豆、紫米。
嫩仙草飲品免費加白珍珠
自家仙草茶同嫩仙草亦配搭成唔同飲品，仙草紫米牛奶冰沙上層係紫米牛奶冰沙，下層係嫩仙草，冰沙口感細碎，以紫米嘅微甜為主，唔會蓋過仙草嘅回甘。而仙草凍奶茶就比較甜，勝在嫩仙草同仙草奶茶都冰涼柔滑。而且嫩仙草飲品系列都可以免費加珍珠！選用白珍珠，無色素同時又有嚼勁。
八時神仙草
地址：中環歌賦街19號地舖
文：Cathy.H
相、片：Tom Li
