叱咤記者會下周一舉行 姜濤fans昂坪紮營半個月霸位

一年一度嘅叱咤樂壇流行榜頒獎禮將於下周一（11月4日）假昂坪舉行記者會，一如以往唔少歌手都會出席，當然包括男團MIRROR。呢幾年叱咤記者會前，都有一班鏡粉提早上山紮營霸位，更試過出現寒流搞到fans冒住風雨野外露宿，搞到偶像們好擔心。

估唔到今年情況更誇張，有姜濤fans（姜糖）喺社交媒體發文，指一班姜糖早於10月20日凌晨已經展開霸位行動。該名姜糖指fans們「輪班守住／好辛苦先爭取到返嚟／日頭返工放工就上昂坪仲有一大堆物資／逐批逐批運上昂坪／衹要為姜濤爭取到最好嘅／乜野都吾辛苦／乜嘢都係值得」，真係好堅。

從fans拍嘅片段可見，喺昂坪紮營嘅姜糖人數至少七八十人，加埋其他fans「割據」嘅各個區域，基本上成個廣場除咗預留做記者會舞台嘅位置之外，只係剩返店鋪前一條通道咁多嘅空間。

不過喺鏡粉通訊群組入面，有人聲稱一批「姜糖」喺昂坪紮營現場以貼紙及印仔識別「自己友」，即使係姜濤fans，但唔係自己人的話都唔可以喺紮營區逗留。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！