家族榮耀之繼承者｜梁諾妍拿督爸爸真實身份來頭超猛 拍攝期間排場勁

TVB劇集《家族榮耀之繼承者》正熱播，Brian（羅子溢飾）、Gigi（梁諾妍飾）、Linda（王敏奕飾）呢段三角戀成為劇情亮點之一，Brian見Gigi拿督爸爸有助其事業發展，於是一腳踏兩船，向Gigi表示會結婚。第19集一集，Gigi拿督爸爸終於出場，原來呢名演員王兆明真實身份係真大馬拿督？

劇情講述Brian、Gigi與Gigi拿督爸爸食飯會面，藉Gigi行開，拿督爸爸即時向Brian詢問二人幾時會結婚，Brian見狀回應指Gigi愛浪漫，所以要好好計劃一下求婚方法，傾偈過程中二人相當投契。飾演Gigi拿督爸爸嘅演員其實係大馬拿督王兆明，為大馬殯葬業龍頭「富貴集團」首席業務發展總監，去年帶領團隊創造高達11億3,800萬令吉（近19億港元）業績，被譽為「金牌領袖」及「銷售之神」等等。

不過，王兆明非常喜愛影視製作，只要有空閒時間就會參與電影及電視拍攝，至今共拍攝逾30部作品，對於今次於《家族榮耀之繼承者》與羅嘉良和佘詩曼等演員對戲感到非常榮幸。由於熱愛演戲，王兆明亦明言即使係跑龍套都唔會介意，亦樂於借出屋企、Office作拍攝場地，藉此坐足全程睇人哋做戲，從中學習演技。

據劇組透露，拿督王兆明於拍攝《家族榮耀之繼承者》期間排場相當勁，除咗有近身保鑣及擔任私人助理嘅太太陪同，更以大馬首部豪華改裝大型商務車代步，座駕寬敞舒適，亦設有超迷你小酒吧、電視及卡拉OK。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！