尋人記2｜93歲胡婆婆剩一成視力 自學英文做保母 方東昇窩心舉動獲網民讚賞

TVB節目《尋人記II》由方東昇、黃曉瑩、李曉欣及黃靖婷主持，節目自播出以來口碑與收視雙豐收，深得觀眾及網民喜愛。噚晚（9日）最新一集就係尋找當年戰後竟能重逢嘅婆婆，而最年輕嗰一位如今已經90幾歲，方東昇及其團隊成功尋回胡婆婆，雖然佢現時只剩下一成視力，不過依然非常精靈，仲同大家一齊重溫當年受訪片段、分享當年做外國人保姆嘅趣事、與老公如何相識等等。

當年胡婆婆嘅同學們就讀陶秀女子中學，不過喺日軍侵華時失散，之後竟然可以憑緣份重聚，而1990年嘅《星期一檔案》就播出佢哋重逢嘅故事。而方東昇、黃曉瑩、李曉欣及黃靖婷就照辦煮碗咁學婆婆去羅三記旺角門市，希望可以搵到羅寶芳，不過可惜佢已經移民。之後，方東昇嘗試改搵胡月華，結果喺一遍關於喺一個活動上嘉許20對結婚20年以上恩愛夫妻，而胡婆婆同佢老公就係其中一對，方東昇亦透過主辦單位成功聯絡胡婆婆。

今年已經93歲嘅胡婆婆，喺兩年前開始視力衰退，現時只剩下一成視力，只可以依靠聽力。雖然婆婆行動不便，不過佢嘅思路非常清晰及中氣十足。喺重溫當年受訪片段時，胡婆婆一聽就認得出同學嘅聲音，仲話同學們已經先後過身，被問到有冇唔開心時，佢就好豁達話：「同學死晒咁濟，冇，人生就喺咁㗎啦！」

之後，胡婆婆去咗廚房食漢堡包，仲話自己最鍾意食嘅西餐係羊架。胡婆婆講得一口流利英語，原因係當年佢爸爸喺中電宿舍工作，而佢就會向外國人請教英文，真係非常好學。後來佢爸爸去咗半島酒店返工，佢喺酒店探班時被酒店管家聽到佢識英文，於是就請佢做兼職保姆。幫外籍酒客睇小朋友同埋帶遊客去觀光。胡婆婆就話90年代保姆好搶手，最高時薪可以高達300蚊港紙。胡婆婆除咗分享一位美國客人手帕都要早午晚三條之外，佢仲分享照顧曳曳小朋友嘅方法，例如小朋友想見父母及揀飲擇食時，佢就會話：「I don’t care」。如果小朋友話唔鐘意佢嘅時候，佢就會回應：「Me too!」。

另外，胡婆婆喺盲婚啞嫁嘅年代已經可以自由戀愛，佢同老公喺7、8歲嘅時候認識，當時成日話「煮飯仔」同扮新郎扮新娘，之後佢哋喺戰後重逢並結婚。以前好多家庭都會生好多小朋友，而思想前衛嘅胡婆婆喺生到第四個小朋友嘅時候就帶頭痛朋友一齊去做絕育手術，佢仲話佢唔係結紮輸卵管，而係切除輸卵管，因為佢唔要宮外孕。

胡婆婆嘅三個仔女已經移民，阿仔Paul原本喺內地工作，不過之後就返香港照顧媽媽，不過佢就話媽媽嘅要求好高，無論係洗碗、洗筷子及掛毛巾等都要用佢嘅方法。同時，阿Paul亦笑言有時會懷疑媽媽係唔係真係睇唔到嘢，因為有時會問佢行去嗰度做咩嘢。

最後，方東昇非常窩心地將32年前胡婆婆與同學們嘅訪問錄製成錄音帶，連埋錄音機一齊送俾胡婆婆，等佢可以聽返當年嘅節目。

節目出街後，唔少網民除咗大讚胡婆婆精靈又思路清晰思路清晰之外，仲大讚節目高質同感動，例如「真係好勁，90歲仲思路清晰」、「仲好精神精靈」、「方東昇拍啲野真係冇得輸 起承轉合、旁白都做得好好」、「婆婆好勁 好有中氣」、「​​今集係高汁」、「尋人記真係好睇」、「睇到眼濕濕 佩服婆婆嘅豁達」、「好出色好感動的一集，胡婆婆積極樂觀，開朗，風趣，很有生命力，用心愛她身邊的人，雖然身邊的人相繼離開，自己身體狀況轉弱，但她把生命看透，對自己的人生無憾，值得我們學習。方東昇與三位主持人用心製作了一個內容充實，既輕鬆又有感動，帶給觀眾思考和感受的一個高質節目，實在太好睇了，感謝方東昇與他的團隊」、「​​婆婆思路清晰，字正腔圓，聲音洪亮，祝佢身體健康，東昇團隊不斷進步，努力加油，拍多啲好節目畀我哋睇」、「主持們很細心送錄音機比婆婆，好感動；祝婆婆身體健康」、「呢集好睇，講唔出點解...沒有感人既故事，但同樣既感動。末段既配樂做得好好，有心思，令人好有感覺。謝謝方東昇團隊既用心製作！」、「每集都睇到有笑有淚，不過又唔會喊出黎，恰到好處，強」及「婆婆無咗視力，但無人可以拎去佢嘅閱歷」。呢一句真係好感動」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！