歐倩怡直認脫節 等錢使交租避答贍養費問題 承認屋企真係冇痰罐

歐倩怡Cindy同郭晉安5月宣布離婚後，歐之後喺網上節目自爆多年前曾經患上重感冒，聲稱身邊人懶理佢又暈又嘔都冇叫十字車，Cindy話自己之後攬住痰罐暈咗。呢段經歷引起外界嘩然，加上郭晉安同家姐創立嘅保健品公司早前上市，披露郭晉安將股份轉移俾家姐，令網民思疑安仔係咪避免被「分身家」。郭晉安其後回應「痰罐」事件，強調屋企冇痰罐，令歐倩怡反而成為眾矢之的。

歐倩怡尋日出席HOY TV節目錄影，原來係佢宣布離婚後首次公開露面。已取得營養師資格嘅Cindy，而家都有做相關工作，但就直言希望做返多啲幕前工作，直認脫節。佢仲承認「等錢使」，因為要交租。但對於贍養費問題，歐倩怡聽完冇回答。

提到「痰罐」事件，歐倩怡話自己有20年冇喺幕前，「以後會小心啲，我只係講出自己感受。算啦，過咗去」。至於關鍵「證物」痰罐，歐倩怡承認屋企嗰個真係唔係痰罐嚟，但就話因為節目冇咩時間俾佢形容。被問到離婚原因，Cindy話家家有本難唸的經，好難三言兩語解釋，一匹布咁長，但就否認有新戀情。歐倩怡同時表示已經丟淡離婚嘅傷痛。

歐倩怡同郭晉安嘅一對仔女分別16及13歲，大仔而家喺英國讀書，細女對跳舞有興趣。歐倩怡話中秋會同個女食飯過節，上個禮拜同個女一齊參加跳舞學校演出，而個女就想做dancer。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！