傳與朱敏瀚年底拉埋天窗 陳曉華終開腔回應

陳曉華（Hera）早前傳出與朱敏瀚（Brian）秘密拍拖及同居，兼指佢哋已經見家長，於年底喺東南亞國家舉辦婚禮。消息傳出後，二人都未有作出回應，去到噚日（25日）陳曉華出席劇集《金式森林》煞科宴，終於開腔回應事件。

喺噚日，狀態非常好嘅陳曉華出席劇集《金式森林》煞科宴，期間被傳媒問及年底與朱敏瀚拉埋天窗一事，佢就笑住否認及強調係假嘅，表示佢哋真係唔會結婚。陳曉華再話有人話佢有咗BB添啦，之後佢就表示自己冇結婚亦都冇BB。之後，傳媒問佢有冇拍拖，定係玩神秘時，佢就冇回答有冇拍拖，只係話自己啱啱拍完劇，而家先有閒情去處理身邊嘅事，如果有好消息會同大家講，不過就強調冇結婚。Hera仲話有婚紗舖問佢要唔要贊助婚紗畀佢，但係就好開心，因為大家都係咁恭喜佢。

至於被問及朱敏瀚係唔係佢喜歡嘅類型，佢就話未了解清楚，要再了解下先，但就強調一定唔會閃婚。同埋佢界定唔到朱敏瀚係咩嘢類型，同時仲話監製教佢有啲嘢係唔可以睇表面，要了解耐啲先至可以下定論，唔好妄下決定。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！