王嘉慧暫無意繼承父業 陳聖瑜王嫿嫿 觀眾至Like

香港小姐候選佳麗昨日於商場進行「現場觀眾至Like佳麗」活動，最終由陳聖瑜及王嫿嫿成為雙冠軍，後者更興奮得眼有淚光，笑指日前獲師姐劉倩婷送贈擺設催旺人緣，果然非常有效。

《2021香港小姐競選》之「現場觀眾至Like佳麗」活動昨日舉行，20位候選佳麗分組接受考驗急才及創意，師姐謝嘉怡亦現身分享參選心得，經過一輪測試後，最終由陳聖瑜（Yvette）及王嫿嫿成為雙冠軍。

感激劉倩婷贈擺設

宣布一刻嫿嫿眼有淚光，非常感動，事後跟Yvette一齊受訪，表示對獲獎感驚喜：「見到個獎個名，唔知道大家鍾意我，之前師姐劉倩婷喺Staycation期間，送咗個桃花擺設畀我哋，好有用。」Yvette則透露與幾位佳麗畫畫的主題相同，沒想到自己會勝出：「多謝觀眾們，感受到個氣氛好好。」2人更指今次獲獎對晉級的信心大增。而師姐謝嘉怡建議她們要有獨特之處，Yvette說：「呢方面我會喺問答環節展現出嚟。」嫿嫿亦指屆時會盡情表現自己，她說：「我特點係表情多，講嘢好認真。（廣東話需唔需要更進步？）永遠都需要。」

而王嘉慧（Cathy）對於被爆是「學霸」之餘，父親更有「內地家具大王」之稱，擁有300間加盟店遍布全國，她表示擔心父親看了報道會不開心：「因為佢平時好低調。（爸爸有300間加盟店？）我好少過問佢嘅生意，報道爆咗出嚟我都愕然。（有冇叫你接手佢嘅生意？）暫時我都想做自己喜歡嘅嘢先，本身有健身教練牌，方便發展，所以過多幾年先。」

謝嘉怡期待媽咪美食

至於謝嘉怡透露父母即將來港，屆時母親會在此定居：「呢排搵緊屋搬，過去1年自己住，依家要搵間大啲。佢哋返嚟我好開心，因為平時夜晚放工唔想煮，多數出街食，好悶，又會肥啲，媽咪返嚟可以一齊食，佢煮嘢都好好味。（媽咪喺香港冇朋友都返嚟陪你，好偉大！）係呀，佢覺得我呢幾年會喺香港發展嘛！」