雅虎香港新聞 監警會委員余黎青萍批港姐泳裝「個個著到少到不得了」 TVB發聲明強烈譴責：保留追究權利
今屆港姐將會喺星期日舉行決賽，不過未開騷已經有負評！尋日獨立監察警方處理投訴委員會（簡稱監警會）舉行會議，會上監警會委員余黎青萍討論期間提到「近期啲電視同電影嘅色情暴力非常氾濫」，更批評港姐泳裝環節「個個著到少到不得了」，又話「答問題嘅時候，使唔使要喺冷氣房裏面，對住曾志偉嗰啲咁樣……瞪大眼望到實，點解要着三點式游泳衣嚟答問題呢？我真係唔明」。余黎青萍更希望相關部門檢討指引，「睇吓係咪要嚴格一啲」。
向來同政府關係良好嘅TVB，今日發聲明回應言論，指有個別人士以指名道姓的方式對本台高級行政人員作出惡意及不實指控，並道「其本人公開言論中，並沒有舉出其他電視台同樣舉辦的相關選美活動作引指，言論存在針對性，本台強烈譴責相關言論。有關人士亦刻意將本台《香港小姐競選》的傳統比賽內容與社會上與虐待兒童、色情又暴力相關議題掛勾，在公眾場合以監警會委員身份發表此等言論，有違道德之嫌，不負責任的行為不但誤導觀眾及大眾，亦對參選《香港小姐競選》的女士構成不尊重及惡意誣蔑」。
聲明更指出，TVB嚴格遵守《電視通用業務守則》，並重申「對於所有針對性之不實指控及惡意揣測，本台必定保留一切法律追究權利」。
今年81歲嘅余黎青萍，曾任教育署長等崗位，上屆特首林鄭月娥參選時邀請余黎青萍擔任競選辦資深顧問。2019年反修例風波期間，林鄭月娥委任余黎青萍加入成為監警會成員。余黎青萍胞弟係著名肝臟醫生黎青龍。
是日精選
監警會委員余黎青萍批港姐泳裝「個個著到少到不得了」 TVB發聲明強烈譴責：保留追究權利
傳MIRROR擬明年7月再進軍紅館 MakerVille指報道不真確
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
