直播靈接觸︳鄧兆尊三太Nana示範請狐仙上身 電視史上第一次？

鄧兆尊嘅「三號愛人」Nana（陳妙慧）星期一晚現身TVB PLUS節目《直播靈接觸》，同法科師傅陳法齊大談「薩滿」話題。曾自稱有靈力嘅Nana更示範如何請仙，主持梁思浩仲話係「香港電視史上第一次」！

Nana透露16歲開始能夠接觸到靈體，源於當時屋企曾經有女子上吊身亡，自己更聽到「拖鞋聲」，但對方拍佢膊頭安撫話「唔會傷害佢」。Nana又聲稱以前公司有同事喺火災身亡，死者問佢「點解會係我？」。

之後Nana同陳法齊就示範請神上身，Nana喺薩滿鼓聲下開始唸出「仙話」同普通話，但仙家以「天機不可洩露」為由不願透露太多。同場一位善信問起家事，事前Nana並不知情﹐但請到嘅「鬼仙」就指出善信家族先人祖墳出問題，令陽間家人有爭吵，更問出善信家人冇「合葬」。

而喺節目另一部份，Nana同另一位男弟子一齊請仙，但兩位所請嘅仙家互相鬥嘴。陳師傅解釋動物仙可能會比較「真性情」，今次已經畀面，因為試過仙家同弟子動粗。

請仙以外，Nana同陳師傅更為英國觀眾F先生家中一隻懷疑帶住靈體嘅毛公仔喺節目完結後作法，因為F先生2年前網購毛公仔之後家中出現唔少怪事，甚至連F先生丈夫都入埋院，梁思浩建議處理咗隻毛公仔，Nana仲話附身嘅係「惡靈」！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！