相差21歲 享受被照顧 謝安琪演鄧月平阿媽 零代溝！

謝安琪與鄧月平在新片演母女，現實中2人年紀相差21載，難怪謝安琪笑言絕對生得出，故沒半點違和感。她指雙方戲裏戲外性格相反，對方更送她養生藥包，非常有愛！

謝安琪（Kay）、唐詩詠、鄧月平（Larine）與ANSONBEAN等，昨日出席電影《臥底的退隱生活》開鏡，與新一代演員合作，Kay與詩詠同聲表示冇代溝。

談到與Larine年紀相差21年，Kay笑指首次拍戲有咁大個女：「記得第一次見面，我數數吓，原來真係做到平平媽咪，實際年紀生得佢出。」但年紀差距無阻2人溝通，Kay大讚Larine細心：「佢開工前提供好多養生小藥包畀我哋，又帶好多零食請大家食，覺得佢好有愛，戲內我照顧佢，但戲外佢就好照顧成個劇組。」Larine則指片中Kay對她很嚴厲，但戲外2人性格剛好相反。她在片中不乏打戲，開拍前特地搣脂、做運動及食得清淡，成功減掉6kg，現時僅得42kg，相當輕盈。

ANSONBEAN趁機偷師

至於鮮有與小鮮肉合作的詩詠，今次與年僅21歲的ANSONBEAN演對手戲，表示早於圍讀時已覺得對方很有想法：「同佢合作會好開心，希望撞到好多火花。」問會否想加入感情線？2人同聲Say No，詩詠笑說：「唔使要呢啲啦！我差唔多大佢兩輪呀！（唔鍾意姊弟戀？）我都OK嘅，但姊弟戀唔係一件好特別嘅事，佢眼細細幾可愛，唔似一般韓仔。」而ANSONBEAN表示會趁機向視后詩詠偷師：「想問佢點樣設計角色。」