賺少3成 谷德昭賣九龍塘豪宅賺3800萬 3年套現逾7千萬

導演谷德昭近年較少作品面世，除咗舊年同多位導演合導嘅抗疫電影《總是有愛在隔離》之外，對上一套個人執導電影已經係2018年由陳奕迅同李榮浩主演嘅《卧底巨星》。減產唔使憂，因為肥谷又賣樓！

地產界有消息指，九龍塘花園一個地下連花園特色戶最近成功賣出，成交價約6200萬元，換算呎價超過2萬8千元，貼近市價水平。單位實用面積2154平方呎，並有2458平方呎花園。據知單位業主係谷德昭同埋家姐谷少芳持有嘅公司，2007年2月以2360萬元買入，帳面賺3840萬元。有報導提到單位本身係業主自住，2016年試過以8800萬元放盤但唔成功，今次成交價低過上次叫價近3成。

今次以外，原來肥谷大約3年前已經將何文田嘉樂園頂層連天台一個7百幾平方呎單位沽出，成交價1190萬。呢個單位係肥谷喺2002年樓市低迷期買入，埋單勁賺超過3倍。兩單deal加埋肥谷合共套現近7400萬，扣埋供樓成本等等都有唔少落袋，梗係可以輕鬆啲。

清減唔少嘅谷德昭近年多數參與主持工作，包括間中喺商台做《在晴朗的一天出發》嘉賓主持，上年亦都為ViuTV拍《納米無明火》，上門探訪住蝸居嘅年青人，同佢地一齊喺斗室煮飯開餐。谷德昭亦係早排《全民造星4》總決賽5位評判之一。肥谷喺加拿大讀大學，亦有家人喺當地，前年年底受訪時佢提到好鍾意溫哥華，但亦都透露未有計劃移民，而且喺當地生活8年都冇申請入籍，強調自己唔係加拿大人。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！