陳詩欣宣布封盤 齊睇現役「是非精 」感情狀況

無綫綜藝節目《學是學非》由2013年開始播出，至今總共拍攝過7輯，每一輯都深受觀眾喜愛，一班主持人「是非精」都成功入屋。現年29歲嘅陳詩欣（Eunice）於2019年年尾加入《學是學非》，憑住樣子甜美及fit爆身形，成功俘虜一眾網民。今日Eunice喺社交網站宣布與拍拖3年嘅圈外男友陳爾正（Joshua）拉埋天窗，及大爆男友上年11月嘅求婚過程：「今天終於可以把這份喜悅分享出來，我們要結婚了！ 在上年的11月 ，你悉心安排的求婚，過了大半年，我每一次想起也會感動，怎麼會有一個傻瓜在求婚當晚的晚餐，每一道餸也加了自己最討厭吃的雞蛋，這個難忘的一晚是我人生最美麗的畫面。謝謝你這麼寵愛我，謝謝你的善良溫柔，謝謝你選擇了我成為你的另一半，以後我倆手牽手一同成長一同經歷，餘生請多多指教。我愛你 ，陳爾正」唔少藝人及網民知道喜訊後到紛紛留言送上祝福。陳詩欣宣布封盤後，相信令到一眾宅男粉絲心碎！其實《學是學非》除咗Eunice之外，仲有好多靚女主持，不如而家就同大家睇下呢班現役「是非精 」嘅感情狀況啦！

張寶兒
張寶兒（Bowie）喺2016年因拍攝《打工捱世界II》與無綫小生袁偉豪相戀，二人拍拖三年感情穩定，並於上年年尾喺清水灣愛巢秘密註冊，正式升呢做人妻。

馮盈盈
「話題女王」馮盈盈嘅感情生活一直備受關注，佢喺前年年尾宣布與拍拖4年嘅同居男友Martin分手，回復單身嘅佢不愁寂寞，先後與鄭衍峰（Leonard）及賭王兒子何猷亨傳緋聞，之後又與西裝男喺高級餐廳撐枱腳。

麥美恩
傻大姐形象入晒屋嘅麥美恩（Mayanne），入行多年都係緋聞絕緣體，只與許文軒（Edmond）傳過。二人喺2017年開始傳出緋聞，但佢哋一直未有認戀，只會不避嫌咁公開打情罵俏，又以情侶檔身份搵真銀。

劉穎鏇
現年24歲嘅劉穎鏇（Tiffany）喺2018年宣布與男友分手，同年年尾就有報道指佢暗撻港男胡㻗，更被影到佢同胡㻗密會，仲喺車廂內疑似摸黑親熱，其後否認拍拖，去到今年強調二人只係朋友關係。

何依婷
無綫力捧小花之一嘅何依婷（Regina），憑「是非精」成功上位後，早前更被點名做第一女主角。現年單身嘅佢，早前被指上位後即與拍拖數年嘅窮男友斬纜，佢就話當同前男友係一齊時間長，因了解對方而分開，自己亦唔急於拍拖。

鄺潔楹
「仙氣女神」鄺潔楹（Judy）上年年尾被爆出與年約30歲經營酒吧嘅富二代男友Ricky Yung拍拖，仲已經發展到半同居關係。早前有報道指Judy生日就邀請咗一班朋友到Ricky嘅餐廳大搞校服生日派對，期間二人有傾有講，Judy仲不時向Ricky撒嬌。

戴祖儀
歌手戴祖儀（Joey），除咗唱歌之外，喺演戲及主持方面都有不俗嘅發展。佢曾與「女神收割機」羅天宇傳緋聞，當時更加被影到佢哋去行沙灘同撐枱腳，不過之後戴祖儀強調佢哋冇拍拖。之後，佢就傳出與從事藝術投資生意嘅Michael傳出緋聞。

何泳芍
「​美人魚港姐」何泳芍（Honey）喺今年2月接受時傳媒訪問時自爆與外籍男友分手，去到3月就有報道指「朱凌凌」吳偉豪 與Honey一起行山放狗傳緋聞，但吳偉豪否認。

陳欣茵
陳欣茵（Yanyan）喺拍攝《#後生仔傾吓偈》受到關注，其後更成功加入《學是學非》做「是非精」，早前有網民指Yanyan嘅男朋友係人氣Youtuber「熊仔頭」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！