香港4大Crêpe推介！M9和牛可麗餅、蘋果金寶奶油醬口味

法式可麗餅又名Crêpe，係一種來自法國嘅傳統煎餅，可以有甜有鹹，而鹹嘅呢通常會被稱為Galette。Crêpe餅皮薄身濕潤帶蛋香，加埋唔同嘅餡料令人難以抗拒。香港都有唔少出色嘅法式可麗餅專門店同供應Crêpe嘅餐廳，仲有好多唔同口味選擇，款款都好吸引！揀啱嘅經OpenRicey網上訂座，更可同時賺取Rice Dollars當錢使！

傳統法式餐廳 La Crêperie 

餐廳主打法國Brittany嘅地道美食，包括正宗法式可麗餅Crêpe同Galettes等，加埋合共有接近40款口味，多到唔知點揀好～用咗法國Brittany不含麩質嘅蕎麥粉煎嘅Galette，推介Les Pierres Noires，入面有太陽蛋、芝士、Smoked Ham及番茄，鹹香味十足。甜品控當然要食Crêpe，Le Pecheur，中間係焦糖香蕉同cream，配上朱古力醬格外香甜，再加上杏仁片口感更豐富，另外焦糖fans要試埋LE DEFI，焦糖雪糕配焦糖香蕉及海鹽焦糖醬！

M9和牛可麗餅 Café Crêpe 

來自加拿大嘅過江龍，所有食譜都跟足溫哥華嗰邊製法，務求令大家食到最原汁原味嘅法式Pariasan Crepe。招牌有蘋果金寶奶油醬法式薄餅、肉桂配甜酒及香草忌廉芝士法式薄餅，同埋龍蝦肉配秘製紐堡醬香草法式薄餅等口味。餐廳最近仲推出一系列全新和牛菜單，M9和牛可麗餅選用澳洲M9和牛，油脂分佈平均，牛味濃郁。配埋蛋香味濃嘅法式可麗餅，再加上傳統法式芥末，味道好有層次。

田園風型格Cafe Muse Furniture Lab 

放假想離開市區又想食Crêpe，元朗錦上路附近都有一間主打Crêpe嘅咖啡店。首先環境已經令人心曠神怡，綠色嘅人造草地配上黑色主題裝修，大自然得嚟帶點型格。菜式方面最受歡迎係黑松露香煎帶子大蝦法式可麗餅，大蝦同帶子都煎得好香口，帶淡淡黑松露香，加埋芝士、太陽蛋同椰菜絲，一啖食入口好滿足，配埋辣辣地嘅醬汁又無咁漏。

多款特色甜鹹口味 Crêpe Delicious

又一間來自加拿大嘅法式可麗餅專門店品牌，餐廳採用新鮮入口原材料，班戟漿更直接由加拿大進口。每份班戟即點即做，餅皮微厚帶韌性，蛋味香濃，餡料豐富。焦蘋肉桂甜薄餅配上用焦糖輕煮嘅蘋果、雲呢拿吉士及焦糖核桃，上層再加多三塊新鮮蘋果，成個薄餅甜而不膩，又食到蘋果嘅爽脆。美式手撕豬肉鹹薄餅都幾有驚喜，手撕豬肉配上清爽嘅牛油生菜及紅洋蔥，味道濃味得嚟又帶點清爽。

文: Yanica