《大叔的愛》首播網民反應熱烈 Edan貫徹零偶包 黃德斌反差萌勁搶戲

·5 分鐘文章
《大叔的愛》截圖
《大叔的愛》截圖

萬眾期待嘅港版《大叔的愛》喺噚晚終於首播啦!劇集搵嚟MIRROR成員Edan(呂爵安)、Anson Lo(盧瀚霆)及黃德斌主演,主要講述地產代理田一雄(Edan飾)被上司翟國強KK(黃德斌飾)及同事凌少牧(Anson Lo飾)追求,展開一段辦公室三角hehe戀。唔講咁多,而家就同大家睇下首集網民反應啦!

節奏明快
港版《大叔的愛》將日版嘅7集改編成15​集,噚晚第一集劇情已經交代阿田與阿牧同居、KK被阿田手機有大量偷拍佢嘅相片及KK向阿田表白等等。唔少網民都紛紛大讚劇集節奏明快,例如:「節奏好快」、「個節奏好爽快」、「睇慣港劇慢吞吞嘅故事節奏呢套野簡直係暴走」及「劇情節奏幾正 好快希望唔好衰收尾」等等。

選角準到冇得輸
劇集主角搵嚟呂爵安(Edan)飾演田一雄(即田中圭飾演嘅春田創一)、盧瀚霆(Anson Lo)飾演凌少牧(即林遣都飾演嘅牧凌太)及黃德斌飾演嘅翟國強(即吉田鋼太郎飾演嘅黑澤部長),大家睇完噚晚嗰集都大讚劇組選角非常之好。Edan喺劇中繼續貫徹零偶包,雖然佢嘅演技雖然有少少浮跨,不過網民就認為有日劇感覺及睇得好舒服;Anson Lo就非常靚仔同演技自然有進步;而極少演喜劇嘅黃德斌就令觀眾相當驚喜,仲大讚佢有喜感及正過原版。至於其他角色方面,唔少網民都留言大讚簡慕華及徐㴓喬(Asha​)好靚女,同埋Stanley演技自然等等。部分網民留言:「兒登真係一生出嚟就係做喜劇」、「Edan完全放下偶包!買少見少!全能呂爵安世一」、「我覺得edan誇張啲反而幾好笑」、「教主牧真係好靚仔」、「阿牧真係好暖男又情深,由Anson Lo飾演真係最完美嘅選角,好好好靚仔呀!」、「Kk一行出黎就勁有喜感」、「最鍾意睇到德斌含春嘅笑容」、「黃德斌超正 正過原版」、「黃德斌個姣樣好頂癮」、「大表哥真係好正 勁大進步」及「Stanley做戲幾自然喎」等等。

《大叔的愛》截圖
《大叔的愛》截圖

片頭有日劇feel
由男主角Edan和Anson Lo主唱嘅劇集主題曲《突如其來的心跳感覺》係一首甜蜜嘅輕快歌曲,歌曲喺片頭播放時加入演員跳舞,唔少網民都大讚好cute同有日劇feel,紛紛留言話:「好可愛嘅片頭」、「有逃恥嘅片尾做片頭,有side story做片尾 呢套反攻到日本喎!」、「跳舞好有逃恥feel」、「片頭好有日劇feel」、「呢個片頭好正」及「大叔跳舞好cute」等等。

《大叔的愛》截圖
《大叔的愛》截圖

笑足全集
除咗演員發揮超水準之外,暴走又搞笑劇情亦令觀眾睇得非常開心,唔少網民都覺得劇集好好笑,紛紛留言話「好笑過日本版好多」、「笑到哮喘」、「同老母一齊笑到格格聲」、「Edan喺office撞鬼咁嗰度 成家笑到失控」、「好耐無睇套劇咁好笑 edan做自己 al真係好正好吸引 德bun都好有喜感..好驚喜好想快d到聽晚」、「笑到手震打唔到字」、「好耐未睇過一部劇可以由頭笑到落尾, VIUTV好野」及「本身睇過日版,仲擔心港版會失色,估唔到都咁好笑」等等。

《大叔的愛》截圖
《大叔的愛》截圖

神還原日版經典場面
大家睇睇預告片時已經發現港版《大叔的愛》出現唔少日版經典場口,喺噚晚就已經有上司KK帶著玫瑰花向阿田表白,期間佢除咗大叫「田田,I love you!」之外,佢仲散發出陣陣少女味,而KK身後嘅燈光亦變埋心心,令網民相當驚喜,紛紛留言大讚劇集有誠意,同日版好似,例如:「好還原日版」、「跟返日版啲心心燈光」、「呢幕兒登exactly做到同日劇一樣 好正」、「還原心心燈好正」及「好似真係睇緊日劇咁」等等。

《大叔的愛》截圖
《大叔的愛》截圖
《大叔的愛》截圖
《大叔的愛》截圖
《大叔的愛》截圖
《大叔的愛》截圖
《大叔的愛》截圖
《大叔的愛》截圖
《大叔的愛》截圖
《大叔的愛》截圖
《大叔的愛》截圖
《大叔的愛》截圖
《大叔的愛》截圖
《大叔的愛》截圖
《大叔的愛》截圖
《大叔的愛》截圖

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能