《思家大戰》以外 5個港版歐美遊戲節目 《百萬富翁》打殘TVB 一蚊Joe玩《一擲千金》入行

·4 分鐘文章
《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡
《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡

TVB今年銳意大搞綜藝節目,最新搞作係搵李思捷主持美國家傳戶曉遊戲節目Family Feud香港版嘅《思家大戰》。歐美地區有唔少遊戲節目都被香港電視台青睞,購入版權製作本地版,亞視更試過執到寶,以《百萬富翁》攻陷TVB慣性收視。

百萬富翁

《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡
陳啟泰當年靠 《百萬富翁》翻身
《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡
星爺都上過《百萬富翁》,仲贏埋100萬

原本係英國ITV節目,2001年亞視買下香港版版權,同年4月底開播後收視不俗,本來只係星期一、三、五播出,去到7月變成一至五播放。《百萬富翁》對TVB收視構成威脅,大台以收視保證張衛健嘅外購劇《機靈小子》對撼失敗,《百》甚至試過以42點收視打贏香港小姐決賽!TVB無計可施之下,要買另一個外國遊戲節目《一筆out消》同場較量。

一筆out消

《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡
《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡

亦係來自英國BBC嘅遊戲節目Weakest Link成為TVB對打《百萬富翁》嘅武器,大台仲派出王牌鄭裕玲主持,唔少人到而家都會記得「你係眾望所歸、冇得留低。你要一筆OUT消,Goodbye!」呢句對白。Weakest Link參加者要揀人淘汰「互片」,比《百》更有睇頭,而由於英版主持Ann Robinson以mean爆黑面風格對待參加者,TVB版本頭6集要DO姐按BBC規定跟足,香港觀眾唔多受落令收視麻麻。後來Do姐「親民」返,收視亦都向上,甚至同《百萬富翁》五五波。

一觸即發

《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡
《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡
《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡
《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡

2002年TVB繼續用問答遊戲吸收視,並且由Do姐好拍檔黃子華做主持。《一觸即發》最有睇頭嘅係一但參加者答錯問題,就會有機會跌入腳下嘅窿窿。當年子華甚至同「窿窿」拎到台慶頒獎禮我最喜愛的拍擋[非戲劇組]!子華拍劇收視有保證,但係《一》除咗頭一周有34點收視,之後就無以為繼喇。

以一敵百

《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡
《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡

2006年亞視再次買下外國遊戲節目版權,今次係荷蘭嘅1 vs 100,港版主持人由黃偉文擔綱。玩法都係益智問答,由1位挑戰者同100位參加者對決,睇下究竟挑戰者有冇本事一直答啱題目,直至100位參加者輸晒。熱愛時裝嘅黃偉文當年話用咗50萬置裝,甚至唔寫詞專心做主持。《以一敵百》雖然未能複製《百萬富翁》嘅熱潮,但係TVB都以遊戲節目《一擲千金》嚴陣以待。

一擲千金

《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡
《思家大戰》以外 5個港版歐美遊戲節目 《百萬富翁》打殘TVB搵《一筆out消》救亡

TVB同樣以荷蘭嘅game show Deal or No Deal同《以一敵百》打對台,主持人分別有許冠文(第一季)同張堅庭(第二/三季),本來人選據講有森美。《一擲千金》不同之處係冇問答成份,參加者以剔除法喺26個寶箱入面揀1個決定獎金金額,香港版由1蚊到300萬不等,過程中會有”banker”定時出價買起寶箱。《一擲千金》最多人記得嘅可能就係一蚊Joe(游莨維)揀中一蚊寶箱流淚收場,結果當時待業嘅佢因禍得福加入TVB,仲做到而家。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能